Vogëlushi Rogen ka fituar betejën me kancerin, pas një lufte të gjatë mbijetese. Njësia e Radioterapisë së Shërbimit Onkologjik të QSUT-së realizoi për herë të parë trajtimin cranio-spinal te vogëlushi. Ky trajtim u realizua falë teknikave të avancuara të rrezatimit, të disponueshme në QSUT në konsultim me kolegët e Spitalit të Neurokirurgjisë dhe Onko-Pediatrisë dhe përfundoi me sukses.

Sot ai përfundoi trajtimin dhe stafi e përcolli duke i dhuruar biçikletën që ai kishte dëshiruar pasi të shërohej.

"Lufta me kancerin nuk është e lehtë, por ne arritëm t’i japim Rogenit trajtimin e duhur me shumë dashuri", thonë mjekët e QSUT.

Edhe ministrja e Shëndetësisë, Ogerta Manastirliu ka komentuar këtë rast suksesi duke falenderuar njëherësh ekipin mjekësor.

"Rogeni përfundoi me sukses trajtimin e vështirë në Njësinë e Radioterapisë në Shërbimit Onkologjik të QSUT ku ekipi mjekësor i radioterapisë neurokirurgjisë dhe onkopediatrisë realizuan për herë të parë trajtimin e specializuar cranio-spinal të një pacienti në moshë pediatrike  Ky trajtim u realizua falë teknikave të avancuara të rrezatimit, mundësuar nga investimet e qeverisë për akseleratorin modern linear në QSUT. Një falenderim nga zemra për ekipin e shkëlqyer të mjekëve dhe infermierëve në QSUT, të cilët jo vetëm trajtuan me shumë profesionalizëm dhe dashuri Rogenin e vogël por stafi vendosi ta percjellë duke i bërë surprizë biçikletën që ai aq shumë e dëshironte!", shkruan Manastirliu.