Pas kryebashkiakut të Lezhës, Fran Frrokaj nga radhët e PD i cili iu bashkua dëgjesës publike të Edi Ramës për buxhetin 2018, një tjetër bashkiak i demokratëve ka marrë pjesë në takimin e Ramës, këtë herë në Vlorë. Kryebashkiaku i Selenicës, Përparim Shameti ka qenë i pranishëm në dëgjesën e Ramës me banorët dhe autoritetet vendore. Rama e ka shfrytëzuar këtë moment duke thënë se "koleg demokrat ndodhet mes nesh”. Kreu i qeverisë nuk kurseu as vlerësimet për këtë bashki. "Bashkia e Selenicës është për t’u përgëzuar, dhe do marrë më shumë financime, sepse nuk ka bërë asnjë rritje të shpenzimeve administrative. Asnjë shpenzim më tepërt. Kjo është pikë kryesore në kriteret e vlerësimit për vitet e ardhshme", tha Rama. 

Nga ana e tij, Shameti iu përgjigj Ramës se duhet të nisin një standard të ri komunikimi kur flitet për shqetësimet e qytetarëve. Ai i kërkoi Ramës, përtej ndasive politike, investime në infrastrukturë si dhe mbështetjen e sektorit bujqësor. “Doja të falenderoja për njoftimin që më është bërë për të marrë pjesë në këtë dëgjesë me publikun, për buxhetin 2018. Nuk jam për të ankuar dhe akuzuar, por bashkia nuk ka patur vëmenden e duhur nga qeveria. Unë si kryebashkiak i Selenicës, kërkoj më shumë përqëndrim të vëmendjes tek fshati, pasi vetë bashkia jonë është e shtrirë në zonë rurale. Ti ke shkuar në Orikum, e s’ke ardhur në Selenicë. Nga ana tjetër ne kemi bërë investime në bujqësi pavarësisht buxhetit të vogël. Në 140 milionë të dhëna nga qeveria, 100 milionë i kam shpenzuar për bujqësinë” u shpreh kryebashkiaku. "Nesër më ke atje, do të vij vetë atje", iu përgjigj Rama. 

Redaksia Online
l.q/Shqiptarja.com