Katër aksidente në pak orë, 2 të vdekur në Tiranë dhe Fier! 18-vjeçarja shpëton mrekullisht pasi u përplas nga autobusi

Një aksident i rëndë ka ndodhur mbrëmjen e sotme në aksin rrugor Mbreshtan–Pashalli, ku një mjet tip xhip-kamionçinë me targë "AA 488 EK" ka humbur kontrollin dhe ka dalë nga rruga, duke rënë nga një lartësi në një përrua. Ngjarja është shënuar në vendin e quajtur “Rezervuari”.

Si pasojë e aksidentit është plagosur drejtuesi i mjetit, shtetasi Kastriot Çuka, 59 vjeç, si edhe tre pasagjerët që udhëtonin me të. Të plagosurit janë nxjerrë nga automjeti me ndihmën e forcave të policisë dhe më pas janë transportuar drejt Spitalit Rajonal Berat, ku po marrin mjekimin e nevojshëm për shkak të plagëve të marra.

Grupi hetimor po punon për zbardhjen e plotë të rrethanave dhe shkaqeve të aksidentit. Vihet re se segmenti rrugor ka mungesë ndriçimi, është i dëmtuar pothuajse në të gjithë gjatësinë e tij dhe paraqet kthesa të forta, çka e bën akoma më të rrezikshëm qarkullimin në këtë zonë.

Një aksident me vdekje ka ndodhur paraditen e kësaj të hëne në aksin Roskovec- Berat, pranë fshatit Strum.

Një automjet ka përplasur një person i cili po udhëtonte me biçikletë dhe për pasojë ka humbur jetën.

Viktima është identifikuar si Gëzim Xhoka, teksa drejtuesi i automjetit është identifikuar si Jamarbër Torro.

Ky i fundit është shoqëruar në Komisariat për veprime të mëtejshme procedurale.

“Rreth orës 10:00, në aksin rrugor "Fier-Berat", në Strum, automjeti me drejtues shtetasin J. T., është përplasur me biçikletën që drejtohej nga shtetasi G. Xh., 50 vjeç, banues në Strum. Si pasojë e përplasjes ka humbur jetën shtetasi G. Xh.

Drejtuesi i automjetit është shoqëruar në Komisariat për veprime të mëtejshme procedurale. Grupi hetimor ndodhet në vendngjarje dhe po punon për sqarimin e plotë të rrethanave dhe shkakut të aksidentit”, njoftoi sot policia.

Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Fier, për veprime të mëtejshme.

Tiranë - Një aksident me pasojë vdekjen është shënuar mëngjesin e sotëm te ish-sheshi Shqiponja, në kryeqytet.

Raportohet se një automjet ka përplasur për vdekje një grua 49-vjeçare.

Ende nuk dihen rrethanat e ngjarjes, teksa policia ka shoqëruar në Komisariat shoferin 30 vjeçar.

“Më datë 01.12.2025, rreth orës 06:20, tek ish-Sheshi Shqiponja, automjeti me drejtues shtetasin D. M., rreth 30 vjeç, ka përplasur këmbësoren A. H., rreth 49 vjeçe, e cila për pasojë ka humbur jetën. Drejtuesi i automjetit është shoqëruar në Komisariat për veprime të mëtejshme proceduriale. Grupi hetimor po punon për sqarimin e plotë të rrethanave të aksidentit”, njoftoi sot policia.

Materialet procedurale i janë referuar Prokurorisë së Tiranës, për veprime të mëtejshme.

Ky është momenti kur autobusi “Green Line” i linjës Astir-Qendër merr përpara vajzën që i preu rrugën me biçikletë në Tiranë. Aksidenti ndodhi mbrëmjen e së dielës pranë Pallatit me Shigjeta. 

Sipas policisë, autobusi është përplasur me pas me dy automjete të parkuara. Për pasojë është dëmtuar 18-vjeçarja dhe tre pasagjerë në autobuz, të cilët nën kujdesin e mjekëve në spital. 

Ndërkohë, shoferi i autobusit është vënë në pranga për shkelje të rregullave të qarkullimit rrugor. 

"Specialistët e Qarkullimit Rrugor arrestuan shtetasin Ç. Sh., 56 vjeç, pasi dyshohet se mbrëmjen e djeshme, në Rrugën e Kavajës, ka humbur kontrollin mbi drejtimin e autobuzit që drejtonte dhe është përplasur me një biçikletë ku lëvizte shtetasja G. K., 18 vjeçe, e më pas me dy automjete të parkuara. Si pasojë, është dëmtuar 18-vjeçarja dhe 3 shtetas që ndodheshin në autobuz, të cilët janë në spital nën kujdesin e mjekëve", njofton policia.