“Trëndafilin kur ta dhashë”, tradita shqiptare në skenë! Ansambli çel sezonin e ri, këngë e valle nga i gjithë vendi

Këngët më të bukura shqiptare dedikuar dashurisë rikthehen në Teatrin Kombëtar të Operës dhe Baletit. “Trëndafilin kur ta dhashë” titullohet koncerti i ngjitur këtë fundjavë në skenë nga trupa e Ansamblit Kombëtar të Këngëve dhe Valleve Popullore, duke prezantuar një udhëtim muzikor nga Veriu, Shqipëria e Mesme deri në Jug e ku u përjetua pasuria kulturore, magjia e këngës shqipe dhe bukuria e valleve tona tradicionale.

“Trëndafilin kur ta dhashë” është një triptik muzikor do të thosha, i ndarë në tri krahina, në tre zona të Shqipërisë: në Shqipërinë e Mesme, në Shqipërinë e Veriut dhe në Shqipërinë e Jugut. Do të përmbajë një repertor kryesisht me lajtmotivin e dashurisë, këngë, valle korale, të cilat trajtojnë të gjitha tematikën e dashurisë.”, - thotë drejtuesi i Ansamblit të Këngëve dhe Valleve Popullore, Sokol Marsi.

Shfaqja sipas Marsit vjen premierë dhe çel sezonin për periudhën janar-korrik, edhe pse më herët ajo është ngjitur në skenë në periudhën e pandemisë, por pa publik. Pjesë ishin solistët e Ansamblit Kombëtar, grupi i valleve, grupi vokal dhe orkestra. Publiku shijoi mes të tjerash vallen e Çamërisë apo vallen e Shqipërisë së Mesme, ndërkohë që qershia mbi tortë ishte Kërcimi i Tropojës interpretuar nga trupa e Ansamblit.

 

B.G/r.k./Shqiptarja.com

TAG:
• Ansambli Kombëtar i Këngëve dhe Valleve Popullore
• sokol marsi