Kreu demokrat, Lulzim Basha, ka reaguar pas triumfit të shqiptarit Ermal Meta në festivalin e këngës në Itali ‘Sanremo’. Basha shkruan në ‘Facebook’ se në këto ditë të vështira kur banditët janë në krye të vendit, një kantautor i ri na fal gëzim dhe na kujton se ka shqiptarë me talent, me energji që dinë të ecin përpara.

Më tej, kryedemokrati shton se njerëz të zotë dhe me vlera ka plot mes nesh, por pak bien në sy, sepse lajmet për Shqipërinë dhe shqiptarët i dominojnë zullumet, trafikantët dhe qeveritarët banditë.

“Në këto ditë të vështira kur banditët janë në krye të vendit, një kantautor i ri, Ermal Meta na fali gëzim duke triumfuar në Festivalin prestigjoz të San Remos. Triumfi i Ermalit na kujton se ka shqiptarë me talent, me energji që dinë të ecin përpara. Shqiptarë të ndershëm, krijues, të suksesshëm, njerëz të zotë dhe me vlera ka plot mes nesh, por pak bien sot në sy, sepse lajmet për Shqipërinë dhe shqiptarët i dominojnë zullumi, trafikantët dhe qeveritarët banditë.

Por e nesërmja i takon shumicës dërrmuese të shqiptarëve të ndershēm dhe me vlera. Triumfi i Ermalit është një përmendore e vlerave të vërteta të tyre. E përgëzoj nga zemra Ermal Metën për çmimin e fituar me talentin dhe punën e tij, dhe i uroj për suksese të tjera më tej! Ky është modeli që na bën krenar dhe na frymëzon si shqiptarë!”, shkruan Basha. 

basha fb
(Urimi i kreut të PD, Lulzim Basha, për Ermal Metën)

d.c./shqiptarja.com