Lufta/ Ministri iranian Araghchi: Marrëveshja me SHBA nuk ka qenë kurrë kaq afër! Trump: Evropa nuk ka qenë e dobishme, por mund të jetë në të ardhmen

Pakistani ka njoftuar se është dakordësuar një tekst i marrëveshjes së paqes mes Iranit dhe SHBA-së.

"Mes përpjekjeve të intensifikuara të ndërmjetësimit që aktualisht po udhëhiqen nga Pakistani, ne jemi plotësisht të vetëdijshëm për fushatën e pamëshirshme të dezinformimit që po zhvillohet nga ata që kërkojnë të prishin marrëveshjen e paqes", shkroi kryeministri pakistanez Shehbaz Sharif në rrjetin social ‘X’.

"Pavarësisht këtyre thashethemeve, ne mund të konfirmojmë se është arritur një marrëveshje mbi tekstin përfundimtar të marrëveshjes së paqes, të miratuar nga palët. Pakistani tani po punon në koordinim të ngushtë me të dyja palët për të përcaktuar hapat e ardhshëm. Paqja nuk është dukur kurrë më afër sesa është sot", shtoi ai.

Foto: Benjamin Netanyahu

Kryeministri izraelit, Benjamin Netanyahu, është zotuar se nuk do ta lejojë kurrë Iranin të ketë armë bërthamore.

Është diçka që e kemi dëgjuar shpesh nga udhëheqësi izraelit.

“Unë dhe presidenti Trump jemi plotësisht dakord për këtë çështje. Për më shumë se 30 vjet, kam qenë në ballë të luftës ndërkombëtare kundër programit bërthamor të Iranit. Po të mos ishte për këtë luftë, Irani do të kishte zotëruar shumë kohë më parë bomba atomike për të shkatërruar Izraelin. Irani po punon për të shkatërruar shtetin hebre dhe unë po ia kushtoj jetën time parandalimit të tyre që ta bëjnë këtë. Për sa kohë që unë jam Kryeministër i Izraelit, kjo nuk do të ndodhë”, përfundon postimi i kryeministrit izraelit" ”, shkroi Netanyahu në X.

Presidenti i SHBA-së, Donald Trump, ndau në llogarinë e tij në Truth Social një postim të Ministrit të Jashtëm iranian, Abbas Araghchi, në të cilin ai shkroi se "marrëveshja nuk ka qenë kurrë kaq afër".

Sipas Aragrchit, nuk “duhet lënë hapësirë ​​për spekulime rreth përmbajtjes, e cila do të bëhet publike në kohën e duhur".

Ministri i Jashtëm iranian, Seyed Araghchi, ka deklaruar se SHBA-të dhe Irani janë më pranë se kurrë arritjes së një marrëveshjeje që do t’i jepte fund konfliktit.

"Memorandumi i Mirëkuptimit i Islamabadit nuk ka qenë kurrë kaq afër përfundimit. Deri në finalizimin e tij, media duhet të përmbahet nga spekulimet mbi përmbajtjen e tij. Në përputhje me qasjen tonë të përgjegjshme dhe transparente, të gjitha detajet do të ndahen me publikun në një kohë të përshtatshme", tha Ministri i Jashtëm iranian Seyed Araghchi në një postim në rrjetin social ‘X’.

Presidenti i Shteteve të Bashkuara të Amerikës, Donald Trump, ka deklaruar se aleatët europianë nuk ndihmuan në arritjen e paqes me Iranin.

Komentet Trump i bëri gjatë një interviste me Corriere della Sera, ku tha se shtetet europiane mund të  jenë shumë të dobishme në të ardhmen.

"A pres zhvillime pozitive në bashkëpunimin me vendet evropiane? Nuk kam asnjë ide. Varet prej tyre", tha mes të tjerash Trump.

"Vendet e G7 ishin të parëndësishme në Iran, por ato do të jenë të dobishme pas luftës", shtoi Trump.

Përtej një kontributi të mundshëm evropian në pastrimin e minave dhe rihapjen e Ngushticës së Hormuzit, samiti në Francë do të trajtojë tema të tjera të nxehta, nga Ukraina te tregtia. Vëmendja e Trump është përqendruar te Irani: kur u pyet nëse pret zhvillime pozitive në bashkëpunim me aleatët evropianë, presidenti u përgjigj: "Nuk kam ide. Varet prej tyre."

Zëvendëspresidenti i SHBA-së, James David Vance, theksoi lidhur me marrëveshjen me Iranin se "nuk lirohen fonde vetëm për nënshkrimin e një marrëveshjeje ose pjesëmarrjen në një takim".

"Po shoh shumë informacione të rreme në lidhje me një marrëveshje të mundshme për të rihapur Ngushticën dhe për t'i dhënë fund programit të armëve bërthamore të Iranit", shkroi Vance në ‘X’, duke theksuar se marrëveshja "është strukturuar për të siguruar që shqetësimet e Shteteve të Bashkuara dhe aleatëve të saj të jenë përparësi, dhe se nëse Republika Islamike e Iranit përmbush detyrimet e saj, atëherë përfitimet ekonomike do të rrjedhin tek ata dhe i gjithë rajoni".

Kjo marrëveshje, shtoi zëvendëspresidenti, "ka potencialin të rindërtojë rajonin dhe të çojë në paqe të qëndrueshme".

Marrëveshja SHBA-Iran përfshin masa për të çmontuar programin bërthamor të Iranit dhe për t'i dhënë fund financimit të grupeve terroriste nga Teherani.

Këtë e raportoi CNN, duke cituar një zyrtar të lartë të administratës Trump, i cili përshkroi një listë kushtesh që Teherani do të pranonte: ‘materiali bërthamor do të shkatërrohet dhe hiqet; programi bërthamor do të çmontohet; nuk do të lirohen fonde iraniane derisa marrëveshja të zbatohet; Ngushtica e Hormuzit do të rihapet dhe Irani nuk do të financojë grupet terroriste.’

Burime të administratës theksuan se kjo është "një marrëveshje e bazuar në angazhime", ndërsa Irani ka deklaruar se nuk është i gatshëm të nënshkruajë një marrëveshje pa lirimin e fondeve të ngrira dhe një angazhim për të siguruar financim për grupet terroriste.

Foto: Israel Katz

Izraeli duhet të ruajë lirinë për të goditur Iranin për të ndaluar programin e tij bërthamor. Kështu  tha Ministri Izraelit i Mbrojtjes, Israel Katz, mes diskutimeve rreth një marrëveshjeje që po finalizohet midis Shteteve të Bashkuara dhe Iranit. 

"Izraeli duhet të sigurojë që, edhe në të ardhmen, ne të ruajmë aftësinë për të vepruar në mënyrë të pavarur për të parandaluar Iranin të pajiset me armë bërthamore", tha Katz, duke shtuar se "Kryeministri Benjamin Netanyahu dhe unë kemi udhëzuar IDF-në të përgatitet në përputhje me rrethanat".

 Donald Trump po "udhëheq përpjekjet drejt një marrëveshjeje me Iranin bazuar në interesat amerikane, duke përfshirë interesin e përbashkët të Izraelit për të parandaluar Iranin të pajiset me armë bërthamore", vazhdoi ai.

"Ne presim që ai ta mbështesë këtë parim, si dhe parime të tjera në lidhje me raketat dhe grupet terroriste aleate", shtoi ai.

Presidenti amerikan Donald Trump ka paralajmëruar Iranin që ‘të kthehet sa më shpejtë në rrugën e duhur.’

“Irani është më mirë të kthehet në rrugën e duhur dhe shpejt”, shkroi Donald Trump në platformën e tij në Truth Social.

Reagimi i Trump erdhi pasi më herët Presidenti amerikan njoftoi se është dakordësuar një marrëveshje për t’i dhënë fund konfliktit me Iranin.

Hezbollahu ka deklaruar se "ka besim" se Irani do të këmbëngulë në përfshirjen e "çështjes së Libanit" në një marrëveshje me Shtetet e Bashkuara.

Politikani libanez i Hezbollahut, Hassan Fadlallah, e deklaroi këtë në një fjalim të transmetuar në televizionin al-Manar.

"Nëse marrëveshja miratohet, ne kemi besim të plotë tek Republika Islamike; jemi të bindur se ajo do të këmbëngulë në përfshirjen e çështjes së Libanit në marrëveshje", tha Fadlallah.

Izraeli po ushtron presion mbi Shtetet e Bashkuara të Amerikës që të parandalojnë zhbllokimin e aseteve iraniane si pjesë e një marrëveshjeje armëpushimi, raporton CNN, duke cituar një burim izraelit të njohur me diskutimet.

CNN raportoi më parë se njoftimi i Trump, duke lënë të kuptohet një marrëveshje të afërt me Iranin, e habiti Netanyahun, i cili po zhvillonte një takim me zyrtarë të lartë të sigurisë mbi Iranin në atë kohë.

Izraeli ka qenë prej kohësh skeptik ndaj qëllimeve të Teheranit në negociata, duke besuar se nuk po negocion me mirëbesim.

Po ashtu, Izraeli beson se edhe nëse do të nënshkruhej një memorandum mirëkuptimi midis Shteteve të Bashkuara dhe Iranit, kjo nuk do të çonte në një marrëveshje përfundimtare, tha një burim izraelit për CNN.

Presidenti i Shteteve të Bashkuara të Amerikës, Donald Trump, ka deklaruar se kushtet që Irani ka publikuar në media për t’i dhënë fund konfliktit, janë lajme të rreme, që s’kanë të bëjnë fare sipas tyre, me kushtet e dakordësuara me shkrim.

"Kushtet që Irani ka publikuar në media janë lajme të rreme që nuk kanë të bëjnë fare me kushtet e dakordësuara me shkrim. Ajo që ata kanë deklaruar, përfshirë pretendimin e tyre të dobët dhe patetik se ekziston një marrëveshje, nuk ka bazë në realitet. Ata janë njerëz jashtëzakonisht të padrejtë për të pasur të bëjmë me ta; me ta, mirëbesimi është një koncept inekzistent", shkroi Presidenti Donald Trump në platformën e tij në Truth Social, duke theksuar se "sulmi i mbrëmshëm me dron ndaj anijeve indiane që largoheshin nga Ngushtica e Hormuzit, i cili u zmbraps plotësisht, është absolutisht i papranueshëm."

Presidenti i Turqisë, Rexhep Tajip Erdogan, ka deklaruar se Izraeli po vijon të shkelë çdo rregull ndërkombëtar, duke vazhduar të derdhë gjak në Gaza dhe Liban.

"Në Gaza dhe Liban, vrasësit sionistë vazhdojnë të derdhin gjak, duke shkelur çdo ligj, rregull dhe parim ndërkombëtar", tha Presidenti turk Rexhep Tajip Erdogan gjatë një ceremonie për të inauguruar Xhaminë Selimije.

"Rajoni ynë po paguan çmimin për bombardimin e Iranit," vazhdoi Erdogan, duke deklaruar se "bota dhe rajoni ynë po dëshmojnë zhvillimet më të rëndësishme që nga Lufta e Dytë Botërore".

Brenda vendit, presidenti turk tha, "ne po punojmë për të zhdukur terrorizmin, me të cilin jemi përballur për 50 vjet. Ne kemi vetëm një qëllim: të sigurojmë paqen dhe sigurinë për 86 milionë njerëzit tanë."