E quajti Papa Leone XIV ‘të tmerrshëm’, Trump: Nuk i kërkoj falje, ai gabon për disa gjëra! Ati i Shenjtë: S'kam frikë, do të vazhdoj të kundërshtoj luftën

Kryeministrja italiane Giorgia Meloni ka dënuar ashpër deklaratat e Donald Trump ndaj Papa Leone XIV, duke i cilësuar ato “të papranueshme”.

“E konsideroj të papranueshme gjuhën e përdorur nga Presidenti Trump ndaj Atit të Shenjtë. Papa është kreu i Kishës Katolike dhe është normale që ai të bëjë thirrje për paqe dhe të dënojë luftën”, u shpreh ajo në një reagim zyrtar. 

Reagimi i Melonit nuk është i vetmi. 

Presidenti Sergio Mattarella vlerësoi mesazhet e Papës për paqe dhe unitet, duke theksuar rëndësinë e përgjegjësisë kolektive për të kapërcyer ndarjet.

Edhe lideri i Lega-s Matteo Salvini u shpreh se Papa është një udhëheqës shpirtëror për miliarda besimtarë dhe se sulmet ndaj tij “nuk janë të dobishme”.

Ndërkohë, kryetarja e Partisë Demokratike Elly Schlein i cilësoi deklaratat e Trump si “akt shumë të rëndë”, duke theksuar se ato tregojnë arrogancë dhe mungesë tolerance ndaj zërave të lirë.

Në të njëjtën linjë edhe Maurizio Lupi, i cili shprehu solidaritet të plotë me Papën dhe mbështetje për mesazhet e tij për dialog dhe paqe.

Donald Trump ka deklaruar se nuk do t’i kërkojë falje Papa Leone XIV, pas përplasjes së fundit mes tyre lidhur me Iranin.

Deklarata erdhi pasi Papa kritikoi kërcënimet e presidentit amerikan ndaj Iranit, duke nxitur reagimin e menjëhershëm të Trump.

"Nuk i kërkoj falje Papës; ai gabon për disa gjëra, nuk do ta bëj, sepse Papa Leone tha gjërat e gabuara. Ai ishte shumë kundër asaj që po bëj në lidhje me Iranin, dhe nuk mund të kesh një Iran bërthamor. Papa Leone nuk do të ishte i kënaqur me rezultatin përfundimtar. Do të kishte qindra miliona vdekje, dhe kjo nuk do të ndodhë. Kështu që unë nuk mundem; mendoj se ai është shumë i dobët në krim dhe çështje të tjera", u shpreh Trump gjatë një konference për shtyp në Shtëpinë e Bardhë. 

 

Imzot Gjergj Meta, presidenti i Konferencës Ipeshkvnore, ka reaguar pas sulmit të Trump kundrejt Papa Leone XIV. Ai thekson se Papa nuk flet me forcën e armëve, por me brishtësinë e fjalëve. Më tej shprehet se përgatitja e paqes është logjika fituese për të pasur paqe dhe kjo e fundit ka qenë fjala e parë e Atit të Shenjtë qëkur u zgjodh në krye të Vatikanit.

“Papa Leoni XIV, një zë i brishtë si vetë Fjala e Zotit …

Papa Leoni XIV ka qenë dhe është i qartë njësoj si Papa Gjoni XXIII me “Pacem in terris” apo si Pali VI me “Populorum progressio” e ashtu si Gjon Pali II që ngriti zërin kundër luftës në Irak, si Papa Benedikti e Papa Françesku që foli kundër ngritjes së mureve dhe luftës ku humbin të gjithë.

Nuk mundej Leoni të ishte ndryshe nga paraardhësit e tij e me siguri nuk mund të shkonte kundër Ungjillit të Ngjalljes ku fjala e parë e Krishtit të ngjallur është “Shalom, Selam, Paqe”.

Sigurisht fjalët e Papës Prevost nuk mund të jenë të pranueshme për gjithkënd, sidomos për ata që mendojnë se paqja vjen vetëm nëpërmjet luftës. Si vis pacem para bellum (nëse do paqen përgatit luftën) është një logjikë gjithmonë humbëse për njerëzimin. Si vis pacem para pacem (nëse do paqen përgatit paqen): kjo është logjika fituese edhe pse ajo më e vështira, por më e sigurta.

Fjalët e Papa Leonit, qysh në minutat e parë të pontifikatit të tij me 8 maj të vitit të kaluar, kanë qenë për një “paqe të çarmatosur dhe çarmatosëse”. Nuk mund të ishte ndryshe në kontekstin aktual të një lufte absurde, ashtu sikurse është absurde edhe ajo në Ukrainë, Palestinë, Liban, Sudan e në shumë vende të tjera. Ashtu sikurse është absurde çdo luftë.

Papa Leoni flet në emër të Ungjillit e në emër të viktimave dhe popujve që vuajnë pasojat e një obeziteti të egos së të fuqishmëve të kësaj bote. E thotë pa frikë e pa drojë, sepse e beson dhe ka këtë mision.

Kushdo shikon te Papa Leoni një “të dobët”, një zë kundër logjikës së luftës, ka të drejtë. Ai nuk flet me forcën e armëve, por me brishtësinë e fjalës, sepse fjala është e çarmatosur, por më e mprehtë se një shpatë dytehëshe.

E bota sot ka nevojë për këtë zë moral e shpirtëror universal edhe kur është kundër të fuqishmëve të botës. Ai, dhe të gjithë ne bashkë me të, nuk duhet të reshtim të kërkojmë ndalimin e luftës dhe respektimin e të drejtës ndërkombëtare. Ashtu sikurse edhe Papa Leoni XIV tha, u kërkojmë të gjithë udhëheqësve të popujve edhe atyre në Shqipëri, që të jenë faktorë të paqes në botë e në rajon. Me luftën humbim të gjithë, me paqen fitojmë të gjithë”, përfundon reagimi.

Papa Leone XIV tha për Reuters se “s’ka frikë dhe do të vazhdojë të flasë kundër luftës”, pas sulmit të drejtpërdrejtë të Presidentit të SHBA-ve Donald Trump ndaj liderit të Kishës të 1.4 miliardë besimtarëve katolikë.

Në komentet e dhëna në bordin e avionit papnor gjatë udhëtimit drejt Algjerisë, ku Papa po nis një turne 10-ditor në katër vende afrikane, ai tha gjithashtu se mesazhi i krishterë po “keqpërdoret”.

“Nuk dua të hyj në debat me të,” tha Papa Leoni për Reuters. “Mesazhi është gjithmonë i njëjti: paqja. Dhe këtë ua them të gjithë udhëheqësve të botës: le të përpiqemi t’i japim fund kësaj lufte. Nuk mendoj se mesazhi i Ungjillit është menduar të keqpërdoret në mënyrën si po bëjnë disa njerëz.”

Vatikani ka reaguar pas sulmeve të presidentit Donald Trump kundrejt Papa Leone XIV. Në një postim në X, prifti Antonio Spadaro shkruan:

“Donald Trump shënjestron Papa Leone XIV dhe në këtë mënyrë zbulon një shqetësim më të thellë. Kur pushteti politik kthehet kundër një zëri moral, shpesh kjo ndodh sepse nuk mund ta përballojë atë. Trump nuk e diskuton Leonen; ai i lutet të kthehet në një gjuhë që ai mund ta kontrollojë. Por Papa flet një gjuhë tjetër, që nuk mund të shndërrohet në gramatikën e forcës, sigurisë apo interesit kombëtar”, thotë Spadaro.

“Në këtë kuptim, sulmi është një deklaratë impotence. I paaftë për të përthithur atë zë, pushteti përpiqet ta delegjitimojë atë. Megjithatë, duke vepruar kështu, ai pranon në mënyrë të nënkuptuar peshën e tij. Nëse Leone do të ishte i parëndësishëm, nuk do të meritonte asnjë fjalë. Përkundrazi, ai përmendet, emërohet, kundërshtohet, një shenjë se fjalët e tij kanë rëndësi.

Këtu shfaqet forca morale e Kishës. Jo si një kundërfuqi, por si një hapësirë në të cilën pushteti gjykohet nga një standard që nuk e kontrollon. Leone nuk përgjigjet në terrenin e polemikës dhe pikërisht për këtë arsye mbetet jashtë mundësive të saj. Ai është i lirë. Dhe kjo liri, e paarmatosur dhe çarmatosëse është ndoshta ajo që shqetëson më shumë. Njëkohësisht, ajo që ka më shumë rëndësi”, përfundon ai.

Donald Trump ka sulmuar ashpër Papa Leone XIV në një postim në Truth Social.

“Është i dobët përballë kriminalitetit dhe i tmerrshëm në politikën e jashtme. Flet për frikën ndaj administratës Trump, por nuk përmend frikën që Kisha Katolike dhe të gjitha organizatat e tjera të krishtera përjetuan gjatë COVID-19, kur priftërinj, shërbyes fetarë dhe të tjerë arrestoheshin për shkak të kremtimit të shërbesave fetare”, ka shkruar ai.

“Preferoj shumë më tepër vëllain e tij Louis sepse është plotësisht MAGA. Ai e ka kuptuar gjithçka. Nuk dua një Papë që e konsideron të pranueshme që Irani të zotërojë armë bërthamore”, u shpreh Trump më vonë para gazetarëve. “S’jam fans i tij.”

Presidenti amerikan deklaroi se Papa Leone “duhet të jetë mirënjohës”, duke pretenduar se emërimi i tij ishte i papritur dhe se nuk figuronte mes kandidatëve të mundshëm. Sipas tij, zgjedhja u bë sepse ishte amerikan dhe shihej si një mënyrë për të menaxhuar marrëdhëniet me presidentin amerikan.

“Nëse unë nuk do të isha në Shtëpinë e Bardhë, Leone nuk do të ishte në Vatikan”, ka shtuar Trump.