Receta

Turshi me speca, lakër e perime miks nga zonja Albana

Në këtë hapësirë të faqes tonë do të gjeni mënyrën e përgatitjes së recetave të gatimit të ideuara nga Zonja Albana. Këto receta Zonja Albana i gatuan çdo ditë në emisionin Rreze Dielli nga ora 09:00 – 10:00.

Redaksia 2 Tetor, 12:21 | Përditesimi: 2 Tetor, 12:23

Turshi me speca, lakër e perime miks

Përbërësit:

2 kg speca të verdhë
4-5 kg lakër e bardhë vendi
500 gr qepë
1 kg domate të bardha
3-4 speca të kuq
2-3 koka të plota hudhrash
1 lugë supe piper i zi kokërr
1 lugë supe rigon
2-3 tufa majdanoz
5-6 gjethe dafine
500 ml uthull molle
500 gr kripë e ashpër

Përgatitja:

LEXO EDHE:
Bakllava me kadaif dhe arra nga zonja Albana

Fillimisht lahen e pastrohen mirë të gjitha zarzavatet dhe lihen të kullojnë. Specave u hiqen farat, kurse lakrat grihen të vogla dhe u heqim kërcejtë. Në një kovë të bollshme hedhim lakrat e grira, domatet e grira, specat e kuq, hudhrat e qëruara, qepët e grira, rigonin, piperin kokërr, majdanozin e copëtuar, dafinën, një dorë kripë, uthullën dhe i përziejmë me të dyja duart. I mbulojmë dhe i lëmë të pushojnë 30 minuta. Ndërkohë fshijmë me një pecetë të thatë specat. Bëjmë gati vazon ose bidonin ku do t'i vendosim turshitë. Në një tenxhere hedhim 3 litra ujë dhe 1 dorë kripë. E përziejmë mbi zjarr dhe e lëmë të marrë valë e më pas e lëmë të ftohet. Fillojmë të mbushim specat me përzierjen që kemi përgatitur në kovë, duke i ngjeshur pak që të mos mbetet hapësirë ndërmjet specave. I vendosim të gjithë në një tepsi të madhe, pastaj fillojmë dhe i vendosim në enën e turshisë, pranë njëri-tjetrit. Mbi specat e fundit hedhim pjesën që na mbetet nga perimet dhe vendosim 3-4 gjethe rrushi mbi të. Kur shëllira është ftohur, ia hedhim me kujdes specave të mbushur. Përsipër i vendosim një pjatë të rëndë, që të dalë shëllira sipër. Herë pas here, duhet kontrolluar, që të mos zbulohen specat, sepse myken e prishen. Gjithashtu, duhet të provohen edhe për kripën. Turshia duhet të qëndrojë kështu rreth 2 javë, dhe më pas të fillojë të shijohet.