U kap me fermë kanabisi në Britani, justifikimi i shqiptarit në gjykatë: Tentova të largohesha por më kërcënuan me armë

Bajram Koleci është shqiptari që u kap në fermë kanabisi me vlerën rreth 200 mijë paund në Britaninë e Madhe por u justifikua në gjykatë duke thënë se e kishin futur me detyrim.

"Më kanë detyruar. Unë jam trafikuar në Britaninë e Madhe dhe kisha borxh para. Qëndrova për 6 muaj atje dhe tentova të largohesha, por u kërcënova me armë dhe me detyruan të kthehesha brenda", tha Koleci.

Policët britanikë kapën ambientin e shndërruar në fermë kanabsisi sipër ish një lokali ku shërbehej qebap dhe patate të skuqura në qytetin e Sëansea në jug të Uellsit. Ata hynë me forcë në ambient më 11 shkurt të këtij viti dhe gjetën shqiptarin 63-vjeçar së bashku me një tjetër person, shkruajnë mediat britanike.

Aty u sekuestruan 686 bimë në total, por vetëm 457 kishin vlerë pasi të tjerat nuk ishin mirëmbajtur siç duhet. Gjithasdhtu u gjetën 2 telefona me të dhëna që i jepeshin  Kolecit, i cili kishte qenë në kontakt me një burrë për ta udhëzuar për listën e pajisjeve të nevojshme për prodhimin e drogës së klasit B. Po ashtu u gjetën prova se kishte ndërhyrje në energjinë elektrike.

Avokati i tij, Stephen Thomas tha: "Ai është një emigrant i paligjshëm, erdhi në Britani për të gjetur punë dhe për t'u përpjekur për të përmirësuar jetën e tij. Ai ka një vajzë dhe grua në Shqipëri që varen prej tij dhe nuk punojnë. E ka pasur shumë të vështirë të gjejë punë ndërtimi në Shqipëri prandaj ka udhëtuar në këtë vend. I pandehuri më thotë se është i sëmurë dhe diabetik, ka rrahje zemre të çrregullt. Gjithashtu ka punuar vetëm për të marrë një shpërblim të vogël. Atij i vjen shumë keq për sjelljen e tij dhe e pranon atë që bëri ishte e gabuar dhe i vjen keq që u përfshi në këtë aktivitet”.

Gjykata vendosi që ta dënojë me dy vite e tetë muaj burg.

TAG:
• bajram koleci
• Britani e Madhe