U kapën duke u puthur në makinën e patrullës, pezullohen nga puna 2 punonjësit e policisë në Vlorë

Dy punonjës të policisë në Vlorë janë pezulluar pasi janë kapur duke shkëmbyer puthje në makinën e patrullës. Inspektorët e identifikuar me inicialet F. Xh. dhe V. Ç., me detyrë punonjës të Patrullës së Përgjithshme të Komisariatit të Policisë Vlorë, janë pezulluar nga detyra pas publikimit të pamjeve.

Në njoftim thuhet se kanë shkelur Kodin e Etikës dhe Rregulloren e Policisë së Shtetit, ndaj janë marrë menjëherë masa për pezullimin e tyre nga puna.

Njoftimi i policisë

Pas publikimit në rrjetet sociale, të një fotoje në të cilën shfaqen dy punonjës policie, në automjetin e shërbimit, duke shkelur Kodin e Etikës dhe Rregulloren e Policisë së Shtetit, Drejtori i Drejtorisë Vendore të Policisë Vlorë ka pezulluar menjëherë nga detyra inspektor F. Xh. dhe inspektore V. Ç., me detyrë punonjës të Patrullës së Përgjithshme të Komisariatit të Policisë Vlorë.

Njëkohësisht, Drejtoria e Standardeve Profesionale në Drejtorinë e Përgjithshme të Policisë së Shtetit ka nisur ecurinë disiplinore ndaj punonjësve të Policisë, për shkelje të rëndë.

Drejtoria Vendore e Policisë Vlorë falënderon mediat dhe qytetarët që denoncojnë raste të abuzimit me detyrën apo sjellje të pahijshme të punonjësve të Policisë dhe i inkurajon që të vijojnë të denoncojnë çdo rast abuziv që mund të kryejnë punonjësit e Policisë.

TAG:
• Vlore
• policia e shtetit