Shtetasi turk, I.R, 28-vjeç, i arratisur pak ditë më parë nga aeroporti i Rinasit, është arrestuar sot në Tiranë, pranë zonës së Muzeut.

Policia sqaron në një njoftim se 28 vjeçari turk arriti të largohej nga tranziti në aeroport 5 ditë më parë, konkresisht në datën 08.08.2016, në një kohë kur autoritetet i kishin ndaluar atij hyrjen në Shqipëri. 

Ai u largua nga Zona e Tranzitit Rinas gjatë kohës kur po i plotësoheshin dokumentat e prapësimit pasi i ishte refuzuar hyrja, sepse nuk plotësonte kushtet e udhëtimit dhe të hyrjes në mënyrë të rregullt në Republikën e Shqipërisë. 

Policia sqaron se janë të paqarta motivet e largimit të turkut, pasi ai nuk rezulton i skeduar nga drejtësia për probleme me ligjin. 

"Nga verifikimet e kryera dhe kqyrja e  pamjeve filmike, rezulton se ky shtetas  ka përfituar nga fluksi i pasagjereve në dalje  dhe rreth ores 15.00 ka realizuar hyrjen në mënyrë të paligjshme nê territorin e Shqipërisë.

Po punohet për zbardhjen e rrethanave dhe arsyet e largimit nga Aeroporti Rinas në ditën e ngjarjes së këtij shtetasi,  pasi ky shtetas nuk kishte probleme me Drejtësinë dhe për këtë po punohet mbi zbardhjen e shkaqeve që e shtynë këtë shtetas për tu larguar në këtë mënyrë", thuhet në njoftimin e Policisë. 

Redaksia Online
l.q/Shqiptarja.com