Ujrat, Greqia nuk heq dorë
“Kemi marrëveshje për detin”

ATHINË - Hedhja poshtë nga Gjykata Kushtetuese e Shqipërisë e marrëveshjes për kufirin në detin Jon midis vendit tonë dhe Greqisë nuk përbën pengesë për qeverinë e Athinës në përpjekjet e saj për të shfrytëzuar pasuritë nënujore. “Me Shqipërinë dhe Italinë kemi marrëveshje lidhur me zonat ekskluzive ekonomike detare të Greqisë”. Ka deklaruar kështu, sipas agjencisë së lajmeve ekonomike Bloomberg, ministri i Energjisë i Greqisë, Jorgos Papakonstandinu. Greqia dëshiron të përcaktojë zonat ekskluzive ekonomike detare ndërkohë që po procedon me kërkimin dhe shfrytëzimin e depozitave të mundshme të naftës dhe gazit nën det, tha ai. Konventa e OKB-së për Ligjin e Detit lejon shtetet me dalje në det që të caktojnë zona të tilla deri në 200 milje detare (370 km) përtej ujërave të tyre territoriale, ku përfshihet e drejta mbi pasuritë natyrore që ndodhen në këto zona, si gazi e nafta.
Por, çdo përpjekje për të caktuar të tilla zona në detin Egje do të hasë kundërshtimin e Turqisë, sipas specialistëve ndërkombëtare. Të dy vendet ende nuk kanë përcaktuar kufirin e shelfit kontinental dhe përmasat e ujërave të tyre territoriale, kur disa ishuj grekë ndodhen vetëm 3 milje detare larg Turqisë.
Por, ministri grek nuk mendon se ka pengesa të tilla me fqinjin verior. Sipas Papakonstandinut, vështirësia me Turqinë qendron në faktin se ky vend nuk ka nënshkruar Konventën mbi Ligjin e Detit. Greqia do të hyjë sërish në bisedime me Egjiptin dhe Libinë për këtë problem, ndërkohë që me Italinë dhe Shqipërinë ka marraveshje në këtë drejtim, theksoi ai.
Disa vite më parë, opinioni shqiptar pati një reagim tepër negativ kur zbuloi se me Greqinë ishte nënshkruar një marrëveshje që i jepte Greqisë një sipërfaqe detare prej afro 300 kilometrash katrore, që nuk i ishte njohur më parë nga Shqipëria. Tani kuptohet pse fqinjët këmbëngulnin për sovranitetin mbi këto ujra.


(aq/shqiptarja.com)