Veliaj: Në 2016 ndërtojmë shkolla
të reja, fund mësimit me dy turne

TIRANE - Një pjesë e rëndësishme e buxhetit të vitit të ardhshëm të bashkisë së Tiranës do t'i dedikohet ndërtimit të shkollave të reja në kryeqytet, duke i dhënë fund kështu problemit të mësimit me dy turne. Kryebashkiaku i Tiranës Erion Veliaj tha se do të ketë partneritet publik-privat për ndërtimin e shkollave të reja.
 
 “Ambicja jonë për të ndërprerë historinë e shkollave me dy turne do të mbarojë vitin tjetër. Jam shumë shpresëplotë që me nismën që kemi për të ndërtuar shkolla, në bashkëpunim publik-privat, ne do të zgjidhim brenda këtij mandati çështjen e shkollave me dy turne. Këtë do ta fillojmë nga viti tjetër, për t’i dhënë drejtim shpejt e për të mos e lënë në ditët e fundit”, deklaroi Veliaj.
 
Në përurimin e çerdhes së re nr. 60 në kryeqytet, kryetari i Bashkisë së Tiranës, Erion Veliaj, informoi se shumë shpejt do të nisë diskutimi i buxhetit të ardhshëm i bashkisë me qytetarët e Tiranës.
 
"Çdo sasi uji që vidhet është një pagesë e munguar me të cilën mund të bëjmë më shumë shkolla, kopshte e çerdhe dhe besoj se viti i ardhshëm do të jetë viti i shkollave, ku ne do të kemi investimet më të mëdha në këto 25 vitet e fundit”, deklaroi Veliaj.
 
Ai theksoi se qyteti mbahet nga të ardhurat, ndaj dhe bashkia do t’i mbledhë rregullisht taksat dhe detyrimet.
 
“Ne jemi në fund të projektit tonë për adoptimin e çerdheve, ndërsa kemi filluar një nismë tjetër me kopshtet dhe duam që, para se të vijnë festat e fundvitit, të sigurohemi gjithashtu, që edhe kopshtet e Tiranës të jenë në gjendje të mirë. Gjithmonë, motoja jonë ka qenë: Ne nuk mendojmë për zgjedhjet e ardhshme, ne mendojmë për gjeneratën e ardhshme”, tha Veliaj.
 
Nga ana tjetër, kryebashkiaku i Tiranës shprehu kënaqësinë se çerdhja që inaugurohet në zonën e Shkozës ka të njëjta standarde si një godinë në Bllok.
 
“Ne nuk i trajtojmë njerëzit si të periferisë dhe të qendrës, si të nënës apo njerkës, si të tyret apo tanët. Në një zonë që me të drejtë mund të jetë konsideruar periferike, me të ardhura të ulëta, sot ka një çerdhe, një institucion model që është në fakt metafora e asaj që ne besojmë”, tha Veliaj.
 
 Ai shprehu besimin se njerëzit trajtohen me të njëjtin respekt kudo qofshin ata dhe në një zonë ku bashkia ka investuar me banesat sociale, investohet edhe në një çerdhe të re.
 
“Shumë shpejt do të vijojmë me investimet në rrugë e infrastrukturë. Kemi shumë punë për të bërë, edhe për dy urat lidhëse që kalojnë në këtë komunitet, kemi shumë raste të përmbytjeve, vështirësive, por çdo gjë me radhë dhe them se e filluam nga e para dhe më e rëndësishmja, nga çerdhja për fëmijët”, përfundoi Veliaj.
 






Redaksia Online
(Gre.M/Shqiptarja.com)