Është zbardhur operacioni i Guardia di Financa në bashkëpunim me policinë shqiptare, i cili është zhvilluar dy ditë më parë dhe gjatë të cilit janë arrestuar 3 shtetas shqiptarë ku u sekuestrua një sasi prej 1.7 tonë kanabis. Fillimisht gomonia është pikasur nga forcat ajrore të Guardia di Finanza të cilat ishin të përfshirë në një operacion antidrogë pas sinjalizimit të autoriteteve italiane nga Policia shqiptare se në drejtim të brigjeve fqinje ishte nisur një gomone e cila po transportonte një sasi lënde narkotike.

Anijet e Guardia di Finanza janë përfshirë në ndjekje të varkës, pasi trafikantët u përpoqën që t’i shpëtonin autoriteteve në det të hapur. Ndjekja përfundoi pak milje larg bregut të San Foca di Melendugno, ku në pranga ranë tre trafikantët me origjinë nga Vlora.

Gomonia që po transportonte 1.7 tonë kanabis ishte nëntë metra e gjatë me dy motorr të fuqishëm. Gjatë kontrollit të gomones janë gjetur edhe armë, një kallashnikov dhe një mitraloz, si dhe dy karikatorë me 30 plumba për secilën armë.
droga itali
(Armë zjarri e gjetur në gomonen me drogë)

Droga ishte e paketuar në 76 pako me peshë të ndryshme, ndërkohë që pesha totale e saj ishte 1741 kilogramë dhe me një vlerë prej 17 milionë eurosh.  Në pranga kanë rënë tre trafikantët, F.M 25 vjeç, AS 25 vjeç dhe OS 25 vjeç, të gjithë nga qyteti i Vlorës.

Tre të arrestuarit janë dërguar në paraburgim me akuzën e trafikut ndërkombëtar të dorgës, si dhe akuza e mbajtjes së armëve të luftës. Gjatë ditëve në vijim pritet që tre të arrestuarit të dalin para gjykatës në mëngrë që t’u caktohet edhe masa e sigurisë. 

gomonia me droge
(Gomonia me kanabis e ndaluar në brigjet italiane)