MALMO - Etrit Berisha ishte protagonisti absolut në finalen e Kupës së Suedisë, duke udhëhequr skuadrën e tij Hacken drejt triumfit ndaj Malmos pas një sfide dramatike që u vendos pas goditjeve të penalltive, në fushën e këtyre të fundit.

Ndeshja përfundoi 0-0 në kohën e rregullt, por në lotarinë e penalltive, ish-portieri i Kombëtares shkëlqeu duke pritur dy penallti vendimtare, të parën dhe të tretën, si edhe realizoi vetë penalltinë e katërt për skuadrën e tij. Hacken fitoi me rezultatin 4-2, duke fituar për herë të katërt në histori këtë trofe.

Berisha u shpall lojtari i ndeshjes jo vetëm për performancën e tij në penallti, por edhe për pritjet e shumta vendimtare gjatë lojës.

“Ndihem shumë mirë. Të gjithë djemtë besuan, edhe pse kishim shumë mungesa. Të rinjtë dhanë gjithçka dhe dolën shumë mirë, edhe pse ishte një ndeshje e vështirë. Tani do të mund të luajmë në Evropë”, u shpreh Berisha pas finales.

Portieri kuqezi shtoi se nuk është hera e parë që shënon penallti. “Nuk është hera e parë që pres penallti dhe shënoj. Bëmë një punë të madhe kundër një prej skuadrave më të mira në Suedi, në fushën e tyre. E dinim që do të ishte e vështirë, por nuk u dorëzuam kurrë”, tha ai. Pas thuajse një sezoni pushim, Berisha u rikthye në fushë dhe ia doli të ngrejë trofeun me Hacken.

Sfida finale nuk ishte e qetë, pasi problemet me tifozët nuk munguan dhe përballja u vonua për minuta të tëra në dy raste.

S.Dh/Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

Komente

  • Sondazhi i ditës: 10 Shkurt, 10:30

    Haga kërkon dënimin me 180 vite burg për ish-krerët UÇK, si e vlerësoni?

Lajme të tjera