POLONI - Një episod me ngarkesë të lartë emocionale dhe politike ndodhi përpara fillimit të ndeshjes mes Oleksandryia (Ukrainë) dhe Partizanit të Beogradit (0-2), e vlefshme për raundin e dytë kualifikues të Conference League, zhvilluar të enjten.

Futbollistët e skuadrës ukrainase refuzuan të shtrëngonin duart me lojtarët serbë, duke qëndruar në heshtje dhe të mbështjellë me flamujt e Ukrainës, ndërsa serbët kaluan përpara tyre.

Ky gjest i pazakontë, por i qëllimshëm, erdhi si shprehje proteste ndaj pjesëmarrjes së Partizanit të Beogradit në një turne futbolli të zhvilluar në Rusi, një vend që Ukraina e konsideron agresor, në kuadër të konfliktit të përgjakshëm që ka prekur rëndë vendin që prej vitit 2022.

Trajneri i Oleksandryias, Kiril Nesterenko, në konferencën për shtyp përpara ndeshjes, ishte i drejtpërdrejtë në qëndrimin e klubit ukrainas.

“Dua të falenderoj ushtarët tanë që na mundësojnë të jemi këtu dhe të përfaqësojmë vendin tonë. Rusia është agresore. Ne nuk mbështesim klubin e Partizanit të Beogradit në asnjë mënyrë për shkak të pjesëmarrjes së tyre në një turne në Rusi. E konsiderojmë këtë si një akt armiqësie.”

Ky reagim i ashpër i skuadrës ukrainase nuk është thjesht simbolik, ai pasqyron tensionet e thella politike që vijojnë të përshkojnë edhe botën e sportit evropian.

Për Oleksandryian aktivizohet edhe shqiptari Tedi Cara, i cili siguroi minuta në këtë sfidë me ngarkesë të veçantë, si në aspektin sportiv ashtu edhe emocional. Ndeshja u zhvillua në Katowice të Polonisë, në një ambient neutral për shkak të pamundësisë së klubeve ukrainase për të luajtur në territorin e tyre.

S.Dh/Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

Komente

  • Truth: 26/07/2025 11:48

    Ky eshte komb. Bravo ju qofte. Kurse ne jemi legena. I presim Serbet si me qene miqtr tane.

    Përgjigju
  • Sondazhi i ditës: 9 Mars, 15:01

    PS nuk jep aprovimin për arrestimin e Ballukut, si e vlerësoni?

Lajme të tjera