Video/Berisha në 1990: Mirënjohja e madhe shkon për shokun Ramiz Alia, udhëhoqi demokratizimin e Shqipërisë

Fakte të pakontestueshme konfirmojnë se Sali Berisha ishte një nga personat më të besuar të kupolës së regjimit komunist, Bllokut, Byrosë Politike dhe sidomos i presidenti Ramiz Aliaj dhe familjen e Enver Hoxhës, me të cilën kalonte fundjavat. Si i tillë, Berisha u përzgjodh për t’u infiltruar me shpejtësi në lëvizjen e studentëve, ku më pas mori edhe drejtimin e Partisë Demokratike, të cilën e kontrollon edhe sot. Disa foto të publikuar vite më parë të Berishës në varkë dhe pranë oxhakut me familjen e Enver Hoxhës, foto të cilat konfirmonin raportet e ngushta shoqërore dhe politike, tronditën besimin tek një pjesë e demokratëve.

Ndërkaq, një tjetër provë për raportet mes Berishës dhe Bllokut është fjalimi i tij në vitin 1990, ku i thur lavde Ramiz Alisë para mijëra qytetarëve që kundërshtonin regjimin. Siç edhe duket në këtë video, Berisha e konsideron Ramiz Alinë udhëheqësin e demokratizimin e Shqipërisë, me të njëjtën mençuri dhe guxim që ka udhëhequr ushtrinë në betejat çlirimtare, gjatë Luftës së Dytë Botërore. “Në këtë mes, mirënjohja jonë e madhe shkon, së pari, tek presidenti shoku Ramiz Alia, i cili me një mençuri dhe guxim që udhëhoqi njësitë e mëdha të ushtrisë sonë në betejat çlirimtare, udhëhoqi vendin tonë në betejat e reja për demokratizimin e Shqipërisë”, shprehet Berisha.

Më pas për interesa të pushtetit, Berisha u shndërruar nga komunisti me i flaktë në antikomunist, duke luajtur këtë kartë për 30 vite me radhë. Berisha nisi të shfaqej si antikomunist vetëm në fund të vitit 1991. Madje, dëshmitarët okularë të takimit të Ramiz Alisë me intelektualët më 10 gusht të vitit 1990, kanë rrëfyer se Berisha ka deklaruar se shqiptarët nuk ishin gati për pluralizëm. “Unë, në radhë të parë, i përmbahem një shprehjeje: Never say never!. Kurrë mos thuaj kurrë. Unë jam i bindur se në stadin aktual ky popull nuk është i përgatitur edhe po t’ia japësh. Jam për pluralizmin e mendimit”, ka pohuar Berisha në takim, sipas Hamdi Jupes, pohim i cili nuk është mohuar kurrë nga Berisha.

Më vonë Berisha ka sajuar një alibi se pse vazhdonte t’i thurte lavde Ramiz Alisë. Sipas tij “Ishte një strategji që kërkonte çështje kohe ku forcat demokratike duhet me çdo kusht të shmangnin përballjen me dhunë”. Ndërkaq, në një intervistë të një ditë më parë, Berisha tha se nuk pranuar që të punojë si mjek i udhëheqjes së Partisë së Punës, ndërsa gënjeu sërish për raportet me familjen Hoxha. “E kam pasur sigurisht si ofertë, por nuk kam pësuar asgjë për hir të së vërtetës... Kam pasur një miqësi të padiskutueshme me të renë e tij, Liljana Hoxhën dhe djalin e tij sokol Hoxhën”.

Ish-sekretari i Ramiz Alisë, Guro Zeneli, njeriu më i besuar dhe bashkëpunëtori më i ngushtë i tij, ka deklaruar se ishte Ramiz Aliaj ai që caktoi Berishën për të shkuar tek studentët. “Janë takuar kur Ramiz Alia bëri mitingun, kur u mblodh e gjithë rinia. Atje janë takuar. Ramizi u interesua të gjente se cilët ishin ata që udhëhiqnin lëvizjen. Kush ishin kryesorët etj. Doli që ishin nga Tropoja. Në këto kushte u caktua Xhelil Gjoni dhe Sali Berisha që të bisedonin me djemtë e Tropojës, Azemin etj. Berisha u caktua se ishte nga Tropoja, ndërsa Xhelili se ishte nga veriu”, ka pohuar ai.

Ndërkaq, njëri ndër udhëheqësit e Lëvizjes Studentore të 8 Dhjetorit 1990, Myftar Gjana, ka pohuar se Ramiz Alia i ka besuar Berishës edhe drejtimin e PD-së. “Si duket Meksi prishi një skemë të të dërguarve të Katovicës në Kryesinë e PD-së dhe në ato vështirësi që ishte, me refuzimin e studentëve që po bëheshin gati për të vdekur në grevë pas tri ditësh (Kam një procesverbal origjinal të mbledhjes së Komisionit nismëtar të atyre ditëve) e me presionin politik të Ramiz Alisë, një muaj para zgjedhjeve të 22 Marsit 1991, Meksi u dorëzua humbës si Hasan Prishtina në vitin 1924 që qëndroi vetëm 24 orë kryeministër”.

Nga ana tjetër, Ramiz Alisë, në mbledhjen e Byrosë Politike në 13 Dhjetor të vitit 1990, shprehet se Sali Berisha ishte i besuari i Byrosë Politike. Aliaj lë të kuptohet se Sali Berisha ishte porositur nga ai për të kritikuar regjimin komunist në gazeta.

/r.k./Shqiptarja.com

TAG:
• sali berisha
• enver hoxha
• ramiz alia