Gjashtë statuja të lashta të epokës romake janë vjedhur nga muzeu kombëtar në kryeqytetin sirian, Damask, duke çuar në mbylljen e përkohshme të objektit, thanë zyrtarët dje.

Muzeu ishte rihapur në janar, ndërsa vendi po rikuperohej nga lufta civile 14-vjeçare dhe rënia e sundimit 54-vjeçar të familjes al-Assad, vitin e kaluar.

Muzeu më i madh i vendit strehon antikitete të paçmuara. Pavarësisht masave të sigurisë, duke përfshirë portat metalike dhe kamerat e mbikëqyrjes të instaluara pas fillimit të luftës, hajdutët arritën të hynin brenda objektit.

Një zyrtar i Drejtorisë së Përgjithshme të Antikiteteve dhe Muzeve të Sirisë tha se grabitja kishte ndodhur të dielën në mbrëmje dhe ishte zbuluar kur një nga dyert në departamentin klasik ishte gjetur e thyer.

Shefi i policisë në Damask, Gjenerali i Brigadës Osama Atkeh, më vonë tha se disa statuja dhe objekte të rralla të koleksionit ishin vjedhur nga muzeu.

Seksioni i muzeut ku u raportua se statujat ishin vjedhur është një departament i bukur dhe historikisht i pasur me objekte që datojnë që nga periudhat helenistike, romake dhe bizantine.

Grabitja vjen vetëm disa javë pasi hajdutët e maskuar si punëtorë ndërtimi vodhën një numër bizhuterish nga koleksioni i xhevahireve të kurorës franceze në muzeun e Luvrit në Paris.

Bizhuteritë, me vlerë rreth 88 milionë euro (77.5 milionë paund), dikur u përkisnin monarkëve, përfshirë Napoleonin III dhe gruan e tij Eugenie. Hajdutët bastisën muzeun gjatë orarit të hapjes dhe grabitja zgjati më pak se tetë minuta.