Ambasadori i BE ne Tirane, Ettore Sequi, ftoi qytetarët të bëhen pjesë e këtij koncerti që nisi sonte në orën 21:00 në kryeqytet dhe do të vijojë turin e tij në disa qytete të vendit. Sequi tha se muzika thyen kufinjtë duke bëre kështu një paralelizëm me aspiratën e Shqipërisë për t’u integruar në BE.
“Kjo lloj muzike, këto lloj këngësh që janë kompozuar në Europë, është shumë e rëndësishme që do interpretohen nga Oleni, një evropian i vërtetë. Oleni me talentin e tij ka kaluar kufij dhe është kthyer në një evropian të vërtetë”, tha ambasadori Sequi.
Ndërsa vetë violinisti tha se ndjehet “shumë i lumtur që m’u dha rasti dhe mundësia të organizoj këtë tour nëpër sheshet e Shqipërisë, gjë që e prisja me vite, sepse nëpër sheshe, më në fund, njerëzit e thjeshtë kanë mundësinë të afrohen dhe të shohin një spektakël, ta shijojnë, pa pasur problemin sa na kushton bileta. Kjo më jep mundësinë t’i jap njerëzve një vizion që, siç tha dhe ambasadori, është një vizion i lirisë”.
(im/shqiptarja.com)