Viti i ri shkollor, Açka në Komisionin e Edukimit: 58 mijë nxënës janë larguar në 5 vite për shkak të emigrimit masiv! Partia e Lirisë: Shqipëria ka buxhetin më të ulët për arsimin në rajon

Në një deklaratë për mediat Ina Zhupa, nga Rithemelimi ka reahuar në lidhje me Kongresin e mbajtur sot në pallatin e Kongreseve për Arsimin nga qeveria. Zhupa tha se ky kongres është dëshmi e qartë e shndërrimit të arsimit në shërbim të partisë.

‘Sot Edi Rama ka zhvilluar punimet e Kongresit Kombëtar të Arsimit. Si kreu i një qeverie pa qeverisje, ai ka folur para kreut të një ministrie pa arsim, dhe drejtorëve të Arsimit pa drejtim. Sepse arsimi nuk ka ikur në ‘drejtimin e duhur’, por në të vetmin drejtim… që është humnera ku e ka hedhur Rama, me ata që At Gjergj Fishta i quante ‘shakllabana’. 

Kongresin e sotëm e hodhi poshtë, vetëm duke folur drejt, ambasadorja gjermane e Bashkimit Europian, kur u tha në sy se, BE ka dhënë 100 milion euro për arsimin në Shqipëri. Siç la të kuptohej ambasadorja, dhe siç duket me sy të lirë çdo ditë, këto fonde europiane janë shpërdoruar, dhe cilësia e shkollimit dhe infrastruktura shkollore dhe universitare, ka bërë mbrapa. 100 milion euro mund t’i kishin ndërruar faqen shkollave shqiptare.

Kongresin e hodhi poshtë mos përfshirja e Komisionit të Edukimit në parlament, qe është organi me i lartë ligjvënës në fushën e arsimit, ku jep llogari ministria. Frika se mos flisnin përfaqësuesit e opozitës, bëri që mos të dëgjonin as deputetët e tyre. Kongresin e hodhi poshtë mungesa e prioriteteve dhe fakti brutal i një buxheti të cunguar për arsimin. Kongresin e hodhi poshtë edhe mosreflektimi i një strategjie për të ardhmen, i degëve prioritare, apo mbështetja e studentëve në kohë krize. Për qeverinë Rama studentët dhe familjet e tyre nuk e ndjejnë krizën ekonomike.

Kongresin e hodhën poshtë, me mospraninë, profesionistët e arsimit, pedagoget dhe akademikët e njohur si Artan Fuga, Mark Marku, e të tjerë. Sepse, po të vinin, Rama do t’i dënonte me riedukim, siç ka bërë me gazetarët. Kongresin e hodhi poshtë vetë Rama, i cili në sy të Ambasadores amerikane tregoi se si ai përndiqte një mësuese që ishte pushuar nga puna dhe merrte pjesë në takimet e kryetarit të PD, Sali Berisha. Kongresi i Arsimit të Ramës, ngjante me kongreset e partisë së të atit, që shkonin nga ‘fitorja në fitorje’, por në fund përfunduan në “koshin e plehrave të historisë”’- u shpreh Zhupa.

Grida Duma ka thënë se shkolla shqiptare duhet të ketë vullnetin e mendësinë e së ardhmes. Teksa uron nxënësit dhe mësuesit në nisje të vitit të ri arsimor, Duma u shpreh se shkolla shqiptare me gjithë vështirësitë e veta, ka misionin e madh të ruajë e ndërtojë njeriun që i mban gjallë ëndrrat nga fëmijëria.

“Uroj që nisja e edukimit, ndjekja e shkollimit të ndjekë realizimin e ëndrrave. Imagjinata, ëndërrimi, vetëpëlqimi, gëzimi i jetës në “lojën e sfidave”, qoftë i plotësuar e zhvilluar në realitet nga edukimi, formimi e dija. Uroj që shkolla shqiptare, armata e mësuesve tanë, të kenë vullnetin e mendësinë e të ardhmes, duke zhvilluar mendjen e fëmijës, jo mekanikisht, jo përmendësh, jo brenda skemave fikse, jo si robotë të notave e kartonave çertifikues.

Nisja e shkollës duhet të jetë nisja e shëndetshme shpirterore e njeriut shoqëror jo e individit të “pakuptutuar”, të bërë rresht nga dhuna mekanike e sistemeve të varfra, ku investohet shumë pak për botëkuptimin njerëzor në shkolla. Vit të mbarë dhe qindra mijëra prindërve e gjyshërve që me dedikim të jashtëzakonshëm presin e përcjellin fëmijët para dyerve të shkollave. Edukimi i njeriut është kujdesi për formimin i shpirtit të tij njerëzor, ku mbështetet mendja krijuese.

Shkolla shqiptare me gjithë vështirësitë e veta, ka misionin e madh të ruajë e ndërtojë njeriun që i mban gjallë ëndrrat nga fëmijëria. E kjo nuk është shkolla ku fëmija vlerësohet as sa “urtë rri”, as “sa shumë bindet”, as sa “përmendesh riprodhon mësimin” e ndonjë teksti shkollor shpesh të keq. E gjitha kjo ishte mashtrimi masiv, që solli dështimin në vitet e komunizmit ku propagandohej njeriu i ri. “Njeriu i ri” a “njeriu i vjetër”, janë në rastin më të mirë, delire propagandash pa rrjedhe historike; njeriu, bota dhe shpirti human janë përjetësisht misioni.

Njerzorja tek njeriu që formojmë, kjo mbi të gjitha!”, shkroi Duma.

Kryetarja e Komisionit për Edukimin Flutura Açka propozoi që në sistemi arsimor shqiptar të bëhen të detyrueshme klasat e notit, të mësohet me detyrim historia e regjimit diktatorial si dhe të bëhet transparencë në lidhje me detajet që lidhen me arsimin. Açka nënvizoi se fëmijët duhet të mësojnë mbi të kaluarën komuniste të vendit, pasi sipas saj në histori përmendet shumë pak.

‘Të bëhet e detyrueshme klasat e notit në shkollat Shqiptare; Në shkollat Shqiptare të vendoset me detyrim mësimi i historisë së regjimit  diktatorial; Transparencë për të gjitha detajet që lidhen me arsimin.’- tha Açka.

Kryetarja e Komisionit për Edukimin dhe Arsimin, Flutura Açka foli për shifrat e rënies së numrit të nxënësve.  Sipas të dhënave tha Açka, në 5 vitet fundit kemi humbur rreth 58 mijë nxënës dhe çdo vit kemi humbur çdo vit rreth 8500 nxënës në vit. Për shkak të emigrimit, deklaroi Açka këtë vit kemi 33 klasa më pak e dy shkolla të mbyllura.

‘Buxheti ka mbetur në kuotat e 3% kur në fakt duhet të jetë deri në 5%. Në vitin 2013 ka qenë shifra e buxhetit në 3.54% dhe nga ky moment jo vetëm që nuk ka pasur shtesë por është ulur.

Kosova harxhon 4.2 % për arsimin. Jemi edhe në rajon shumë më pak. Çështja e dytë ka të bëjë me pakësimin e numrit të nxënësve. Sipas të dhënave shtetërore, në 5 vitet fundit kemi humbur rreth 58 mijë nxënës. Kemi humbur çdo vit rreth 8500 nxënës në vit. Shifrat në një farë mënyrë janë alarmante. Vetëm këtë vit me të dhënat paraprake, kemi 1000 nxënës më pak të regjistruar në këtë vit shkollor. Ne kemi gati 33 klasa më pak. Kemi dy shkolla më pak për shkak të emigrimit masiv. Janë regjistruar fëmijë për dy shkolla më pak. Kemi humbur gati 10% të nxënësve të evidentuar.

Një shifër tjetër ka edhe braktisja e shkollës. Braktisja e shkollave është në shifra deri në 10% dhe mendoj se është një shifër që duhet të na shqetësoj të gjithëve ne. Mësuesit kanë vite që nuk marrin asnjë shpërblim prej vitesh.’- u shpreh Açka.

Jorida Tabaku ka reaguar për nisjen e vitit të ri shkollor duke thënë se regjistrimet janë thuajse 3 herë më të ulëta se një vit më parë. Sipas saj, qeveria nuk është fokusuar për të ndaluar largimin e shqiptarëve, për të cilët thotë se duhet punë e përkushtim që të kthehen në vendin e tyre.

“Suksese të gjithë fëmijëve dhe të rinjve që kanë nisur sot vitin shkollor. Fatkeqësisht regjistrimet këtë vit shkollor janë thuajse 3 herë më të ulëta se sa një vit më parë duke qenë një tjetër tregues i rënies demografike dhe shkretërimit të vendit.

Prej vitesh politikat e qeverisë nuk janë fokusuar në këtë betejë për të ndaluar hemoragjinë e largimit të shqiptarëve. Na duhet punë dhe përkushtim për t’i rikthyer shqiptarët në vendin e tyre, dy cilësi që kjo qeveri dhe mazhorancë nuk i zotëron edhe pse uron përvit prej 8 vitesh vitin e ri shkollor me suksese që patjetër janë imagjinare dhe propagandë për sa kohë numri i nxënësve bie”, tha Tabaku.

Deputetja e Partisë Demokratike, Ina Zhupa, duke publikuar disa shifra krahasuese, thotë se fatkeqësisht janë 226 mijë nxënës më pak në bankat e shkollës në 15 vjet. Zhupa ka evidentuar edhe problematika të tjera në lidhje me arsimin në vend, ndërsa akuzon qeverinë si anti-shqiptare.

‘Vit të mbarë shkollor nxënës dhe mësues! Fatkeqësisht 226 mijë nxënës më pak në bankat e shkollës në 15 vjet. Shifër alarmante që tregon qartë shpopullimin e Shqipërisë nga keqqeverisja. Por edhe pse nxënës më pak, mungesa e vullnetit politik për ti cuar paratë dhe investimet te arsimi ka bërë që problemet të jenë edhe më të thella se 15 vite më parë.

Nga premtimet me klasa dixhitale edhe me 4 milion euro të harxhuara kemi kaluar te librat e përdorur dhe kërcënimet për fëmijët. Librat e përdorur janë larg të qënurit tekste nga të cilat fëmija mund te mësoj edhe të zhvillohet. Tallja me tekste falas vazhdon në ERTV.

Klasat kolektive vazhdojnë edhe pse duhet të ishte realitet i tejkaluar në 2022. Në mes të Tiranës ende zhvillohet mësim me turne. Mungesa e internetit në më shumë se 50% të shkollave rurale( sipas Bankës Botërore vetëm 47% e shkollave rurale kanë akses në internet. Mungesa së bazës mësimore në kabinete ,laboratore në shkollat e Shqipërisë.

Mungesa e ujit të rrjedhshëm në shkolla, edhe në zonat rurale mungesë e ngrohjes dhe ftohtjes së klasave.

Rrogat e mësuesve janë tregues i qartë se si ka dështuar edhe me arsimin kjo qeverisje. Nga viti 2013 deri tani, duke llogaritur edhe inflacionin, rritjen e çmimeve çdo vit, pothuajse nuk ka rritje reale të pagave me Edi Ramën.

Këto janë vetëm disa nga problemet që përballet arsimi sot. Një qeveri që nuk kujdeset për arsimin, është qeveri antishqiptare. E ardhmja është në rrezik! #Shqipërianërrezik’- shkruan Zhupa.

Kryetari i Partisë së Lirisë, Ilir Meta ka reaguar në lidhje me kongresin që po zhvillon kryeministri Edi Rama për Arsimin.

'Me "lart më lart o shokë flamujt e kongresit", nuk mbulohet dot dështimi dhe nënvleftësimi i plotë i arsimit.

Shqipëria ka buxhetin më të ulët në rajon për arsimin. Vazhdojnë turnet, vazhdon analfabetizmi funksional, vazhdon braktisja e shkollës.

Arritja më e fundit është edhe shantazhi e kërcënimi ndaj fëmijëve dhe prindërve të tyre për librat e shkollës.

Kryeministri i krimit s'mund të jetë i arsimit.

Që të mos vidhen më lekët si te inceneratorët, por të shkojnë për arsim cilësor dhe që t'i krijojnë mundësinë fëmijëve të jetojnë dhe të ndërtojnë të ardhmen e tyre këtu, nesër të gjithë tek inceneratori i Tiranës, ora 18:00.

Pavarësisht këtij fjalimi të bezdisshëm dhe propogandistik të Kryeministrit, i uroj suksese mikeshës sime të vogël Aria dhe gjithë nxënësve të Shqipërisë, veçanërisht të gjithë atyre që sot ulen për herë të parë në bankat e shkollës.'- tha Meta.