Inspektori i Lartë i Drejtësisë, Artur Metani, po zhvillon një vizitë pune në Uashington, ku edhe ka takuar disa përfaqësues të institucioneve të ndryshme amerikane.

Në kuadër të vizitës, Metani është pritur në Departamentin e Shtetit, ku ka zhvilluar një takim me zyrtarë të këtij institucioni.

Përmes një postimi në rrjetin social X, Inspektori i Lartë i Drejtësisë ka ndarë detaje nga takimi dhe ka bërë të ditur temat e diskutuara gjatë vizitës.

“Takim i frytshëm me Drejtoren Amy Carnie të Zyrës për Evropën Perëndimore dhe Qendrore në Departamentin amerikan te Shtetit

Shpreha mirënjohjen për vlerësimin e saj për punën e Inspektorit të Lartë të Drejtësisë në forcimin e llogaridhënies dhe përgjegjshmërisë në sistemin gjyqësor të Shqipërisë.

Rikonfirmuam rëndësinë e vijimit të bashkëpunimit dhe mbështetjes për avancimin e shtetit të së drejtës, forcimin e institucioneve të drejtësisë dhe konsolidimin e mëtejshëm të parimeve të llogaridhënies dhe integritetit institucional”, shkruan ai.