Meksika e nis me festë Botërorin, mposht pastër Afrikën e Jugut para tifozëve të vet! Ndeshja me 3 të kuq

Fitorja 2-0 e Meksikës ndaj Afrikës së Jugut në ndeshjen hapëse të Kupës së Botës 2026 nuk solli vetëm tre pikët e para të turneut. Përballja e zhvilluar në stadiumin legjendar 'Azteca' hyri në histori për disa statistika dhe rekorde të veçanta që mund t’u kenë shpëtuar shumë tifozëve.

1. Një ndeshje hapëse që u përsërit pas 16 vitesh

Meksika dhe Afrika e Jugut rikrijuan skenarin e Kupës së Botës 2010, kur dy kombëtaret u përballën në ndeshjen hapëse në Johannesburg dhe barazuan 1-1. Plot 16 vite më vonë, ky duel u përsërit, duke u bërë rasti i parë në historinë e Botërorëve që një ndeshje hapëse luhet sërish mes të njëjtave skuadra.

2. 'Azteca' vendos një rekord historik

Arena ikonike e Mexico Cityt konfirmoi edhe një herë statusin e saj legjendar. Ndeshja mes Meksikës dhe Afrikës së Jugut ishte e 20-ta e luajtur në këtë stadium në historinë e Kupës së Botës, më shumë se çdo impiant tjetër në planet. 'Azteca' kryeson listën me pesë ndeshje më shumë se stadiumi ndjekës.

3. Meksika vazhdon të shkruajë histori pa prekur trofeun

Përfaqësuesja vendase regjistroi pjesëmarrjen e saj të 18-të në një Kupë Bote, rekord absolut për vendet e zonës CONCACAF. Megjithatë, meksikanët mbeten edhe kombëtarja me më shumë ndeshje të zhvilluara në histori të turneut pa arritur të fitojnë trofeun, duke numëruar tashmë 60 takime.

4. Gilberto Mora, simboli i brezit të ri

Një moment historik u regjistrua edhe në aspektin e brezave. Talenti meksikan Gilberto Mora u bë futbollisti i parë i lindur pas finales së Kupës së Botës 2006 që aktivizohet në një ndeshje të këtij Botërori, duke shënuar hyrjen e një gjenerate të re në skenën më të madhe të futbollit.

5. Tre kartonë të kuq dhe një rekord i pazakontë

Përballja ishte e mbushur me tension dhe emocione, aq sa arbitri nxori plot tre kartonë të kuq. Kjo bëri që ndeshja të kishte më shumë përjashtime sesa gola, një statistikë tepër e rrallë në historinë e kompeticionit. Afrika e Jugut u bë gjithashtu skuadra e parë që merr dy kartonë të kuq në një ndeshje të Kupës së Botës që nga viti 2006, kur Portugalia dhe Holanda përjetuan përplasjen e famshme të njohur si 'Beteja e Nurembergut'.

Meksika fitoi 2-0 kundër Afrikës së Jugut në ndeshjen hapëse të Kupës së Botës 2026 në 'Azteca'. Pas suksesit tifozët vendas në Mexico City mbushën rrugët e qytetit duke festuar për orë të tëra paçka një stuhie me shi dhe erëra të forta.

Përtej festës, edhe një protestë e dhunshme që solli përplasjen me policinë u pa në rrugët e kryeqyteit të Meksikës para nisjes së ceremonisë hapëse të eventit.

Afrika e Jugut ka hyrë në histori në mënyrën më të padëshiruar të mundshme, duke u bërë kombëtarja e parë që merr dy kartona të kuq në një ndeshje hapëse të Kupës së Botës.

Mesfushori Yaya Sithole ishte lojtari i parë që u përjashtua nga loja në minutën e 49-të të përballjes ndaj Meksikës, ndërsa problemet për "Bafana Bafana" u thelluan edhe më shumë kur veterani Themba Zwane u ndëshkua me karton të kuq në minutën e 84-të.

Afrika e Jugut u mposht me rezultatin 2-0 nga Meksika, duke e nisur në mënyrën më të keqe aventurën e saj në Botërorin 2026.

Përveç rekordit negativ në një ndeshje hapëse, "Bafana Bafana" u bë gjithashtu kombëtarja e parë që merr dy kartonë të kuq në një ndeshje të vetme të Kupës së Botës që nga turneu i vitit 2006.

Hera e fundit që ndodhi një gjë e tillë ishte në përballjen mes Portugalisë dhe Holandës në Kupën e Botës 2006, një ndeshje që mbeti në histori për numrin e madh të kartonëve dhe përjashtimeve.

Momente ankthi janë regjistruar pranë stadiumit “Azteca” në Mexico City, vetëm pak minuta para ceremonisë hapëse të Kupës së Botës 2026 dhe sfidës inauguruese mes Meksikës dhe Afrikës së Jugut.

Sipas informacioneve të autoriteteve lokale, një tifoz i huaj, identiteti dhe kombësia e të cilit nuk janë bërë ende publike, ka pësuar një infarkt teksa ndodhej në afërsi të impiantit sportiv.

Shërbimet e emergjencës reaguan menjëherë, duke i dhënë ndihmën e parë në vendngjarje përpara se ta transportonin me urgjencë drejt një qendre spitalore.

Burime mjekësore konfirmuan se gjendja e tifozit është aktualisht e qëndrueshme, ndërsa theksuan se ndërhyrja e shpejtë e ekipeve të shpëtimit ka qenë vendimtare për shmangien e pasojave më të rënda.

Ngjarja ndodhi në mes të atmosferës festive që shoqëroi startin e Botërorit 2026, turneut më të madh të futbollit në botë, i cili këtë edicion organizohet nga Shtetet e Bashkuara të Amerikës, Meksika dhe Kanadaja.

Lojtari i momentit i Meksikës, autori i golit të parë në Kupën e Botës 2026, Julian Quinones, është golashënuesi më i mirë në Ligën Saudite për sezonin 2025-26. Sulmuesi i Al-Qadsiah shënoi 33 gola, duke përfunduar përpara sulmuesit të Anglisë, Ivan Toney dhe superyllit të Portugalisë, Cristiano Ronaldo.

Yaya Sithole merr kartonin e parë të kuq në Kupën e Botës 2026. Hera e fundit që një lojtar ishte ndëshkuar me karton të kuq në ndeshjen hapëse të Botërorit, kishte ndodhur në vitin 1994, në Botërorin e SHBA-së. Veç Yaya Sithole të Afrikës së Jugut, karton të kuq morën edhe bashkëkombasi i tij, Themba Zwane dhe meksikani Cesar Montes. Meksika fitoi 2-0 në ndeshjen hapëse.