Vlorë, arrestohet i dyshuari për
vrasjen e pronarit të lokalit

VLORE- Tre muaj pas vrasjes së biznesmenit Amarildo Delaj, policia e Vlorës bën të ditur sot se ka arrestuar të dyshuarin si autor të ekzekutimit. Ai është Bledar Idajet Jambelli, 32 vjeç lindur e banues në fshatin Mbrostar, Fier.

Arrestimi i tij është kryer në 24 orët e fundit nga Drejtoria e Policisë së Qarku Vlorë, gjatë së cilës u arrestuar dhe 9 persona për vepra të ndryshme penale.

“Nga Strukturat Kundër Krimeve të Rënda në Drejtorinë e Policisë Qarku Vlorë u bë kapja dhe ndalimi i shtetasit të shpallur në për veprën penale “Vrasje në rrethana cilësuese” e kryer në bashkëpunim dhe “Armëmbajtje pa leje” për shtetasin Bledar Idajet Jambelli. Nga hetimet e kryera Strukturat Kundër Krimeve të Rënda, dyshohet se ky shtetas është autori i ngjarjes së ndodhur më datë 4 shtator 2012 në lagjen “Osmën Haxhiu” në ambientet e lokal Klind ku është vrarë me armë zjarri shtetasi me iniciale A. D., si dhe janë plagosur dy shtetas të tjerë. “- thuhet në njoftimin e sotëm për shtyp të policisë së Vlorës.

VRASJA ME 4 SHTATOR
Amarildo Delaj, u ekzekutua rreth orës 23: 45 minuta të 4 shtatorit 2012, brenda në lokalin e tij, në dalje të qyetit. Në këtë ekzekutim u plagosën dhe 2 persona të cilët duhet të ketë qenë së bashku me 27 vjeçarin. Nga të dhënat e para mësohet se 27 vjeçari u qëllua me automatik nga jashtë lokalit Klint". Në pjesën e jashtme të lokalit u gjetën 18 gëzhoja. Atëherë u tha se autori kishte qenë me kapele dhe ishte larguar në brendësi të pallateve. Pistat e krimit të atëhershëm ishin motive pronësie, por nuk u përjashtuan as pista të tjera.

JAMBELLI DYSHOHET DHE PER KRIME TE TJERA
Sipas policisë nga hetimet e kryera dyshohet se 32 vjeçari nga fshati Mbrostar i Fierit mund të jetë autor i disa vrasjeve të ndodhura në Vlorë dhe Tiranë. Materialet procedurale i janë referuar Prokurorisë për ndjekje të mëtejshme penale.

Redaksia online
(sg/shqiptarja.com)