Vrasja, avokatja belge nuk sjell 
dosjen, takim privat me Frrokun

TIRANE - Letër porosia e Prokurorisë shqiptare ende nuk ka marrë një përgjigje nga autoritetet belge nëse do të sillen apo jo në vendin tonë aktet hetimore nga dosja ku gjykohet deputeti Mark Frroku për vrasjen e shqiptarit Aleksandër Kurti në vitin 1999 në Bruksel.

Ky fakt është konfirmuar nga avokatja belge e deputetit kristian-demoktat që ka ndjekur atje procesin ndaj tij, e cila vizitoi Shqipërinë prej dy ditësh për të takuar klientin e saj Frroku, të arrestuar nën akuzën e vrasjes. Vetë avokatja Carine Couqelet nuk ka sjellë asnjë akt hetimor apo dosje në ngarkim të Frrokut, pasi sipas ligjit belg kjo procedurë mund të ndodhë vetëm ndërmjet institucioneve.

Përgjigjia nga pala belge pritet të bëhet deri më mes të muajit maj, kohë në të cilin skadon dhe afati prej 40 ditësh në dispozicion të akuzës për kryerjen e kësaj procedure.

Po ashtu, konfirmuan burime për A1Report, avokati në Belgjikë mund të marrë vetëm kopje të dosjes pa vulë apostile, çka nuk i jep mundësinë që dokumente të tilla të përdoren në një shtet të huaj.

Prej 2 javësh deputeti Mark Frroku ndodhet nën masën e sigurisë “arrest me burg”, ndërsa dy avokatët e tij shqiptarw Genci Gjokutaj dhe Saimir Vishaj pritet t’i drejtohen Gjykatës Kushtetuese për ndryshimin e arrestit.

Ndërkohë avokatja Couqlet mësohet të ketë diskutuar me Frrokun për mënyrën e vazhdimit të procesit në Belgjikë, proces i cili pritet të rinisë më 12 tetor pranë Gjykatës së Apelit për Krimet e Rënda atje.

Mark Frroku akuzohet se në vitin 1999 në Belgjikë pas përplasjeve të grupeve rivale të prostitucionit, ka vrarë në bashkëpunim shqiptarin Aleksandër Kurti.

Redaksia Online
(Gre.M/Shqiptarja.com)