Vrasja e 25-vjeçarit nga polici, PD: Akt kriminal! Asgjë nuk ka ndryshuar nga regjimi policor i 30 viteve më parë! Të merren masa (VIDEO)

“Asgjë nuk ka ndryshuar në radhët e policisë në 30 vite në mënyrën e përgjigjes së efektivëve ndaj qytetarëve”. Kështu e ka cilësuar Partia Demokratike vrasjen e 25-vjeçarit Klodian Rashës nga ana e efektivit ditën e sotme në Tiranë.

Përmes një deklarate zyrtare, ish-deputeti Enkelejd Alibeaj thotë se nuk është faji i policit por është faji i kryeministrit Rama dhe Ministrit të Brendshëm Sandër Lleshaj mbi politikat e zgjdhura për drejtimin e policisë.

Ai thotë se asgjë nuk mund ta justifikojë vrasjen e të riut dhe se autoritetet duhet të marrin menjëherë masa për ndalimin dhe manipulimin e ngjarjse dhe zbardhjen e së vërtetës.

“Për këtë akt kriminal të pashembullt duhet drejtësi pa vonesë” – thotë Alibeaj.

Deklarata e plotë e Enkelejd Alibeajt:

30 vjet më parë, si në këtë natë, të rinjtë u ngritën kundër një regjimi që i mbante të izoluar dhe të nënshtruar përmes represionit, dhunës, torturave, frikës, përmdjekjes, burgimit dhe vrasjeve pa gjyq.

30 vjet më pas, me Edi Ramën në krye të qeverisë, asgjë nuk ka ndryshuar në mentalitetin e regjimit policor të drejtimit të shtetit.

Në Ditën e Rinisë, një 25 vjeçar u  ekzekutua me plumb në kokë nga regjimi, sepse nuk respektoi orën policore të karantinës. Një i ri që vrapon për t’i shpëtuar gjobës apo sjelljes brutale, që e kemi parë të gjithë në rastin e 15-vjeçarit gjatë karantinës së parë, nuk përbën asnjë rrezik për policinë.

Ajo që e bën edhe më të rëndë situatën, janë njoftimet zyrtare të Policisë së Shtetit, të cilat krijojnë bindjen e tentativës për manipulimin dhe fshehjen e së vërtetës, me justifikime të denja për një bandë.

Asnjë skenar i sigurimit të shtetit nuk mund të justifikojë ekzekutimin e të riut.

Prokuroria duhet të kishte marrë menjëherë masat për ndalimin e manipulimit të ngjarjes, zbardhjen e të vërtetës sa me shpejt dhe informimin e publikut për ketë ngjarje që ka shokuar të gjithë shoqëinë.

Për këtë akt kriminal të pashembullt duhet drejtësi pa vonesë! Arrestimet sa për sy e faqe, për të mashtruar publikun e revoltuar, shërbejnë vetëm që regjimi i Edi Ramës të blejë kohë.

Policia që vret një të ri në Ditën e Rinisë është modeli më i keq i Policisë së Shtetit. Sot vrasësi i të riut nuk është efektivi i policisë, por Edi Rama dhe Sandër Lleshaj, me politikën e tyre qeveritare të armiqësimit të Policisë me qytetarët dhe bashkëpunimit të Policisë me bandat.

Është irrituese që, në 8 vite, Edi Rama ndërtoi modelin e Policisë që nuk lufton krimin, por burgos, gjobit dhe vret qytetarët e pambrojtur. Kjo është arsyeja përse Sandër Lleshaj vazhdon të jetë akoma Ministër i Brendshëm dhe nuk është shkarkuar nga Edi Rama!

 Është e paprecedentë që në 8 vite, në vend të komunikatave të përditshme sesa grupe kriminale ka zbuluar dhe arrestuar, Policia e Shtetit flet vetëm për sa gjoba u ka vendosur qytetarëve.

Kjo nuk është arsye se përse ekziston Policia e Shtetit. Kjo është një politikë e gabuar, që e armiqëson Policinë me qytetarët. Prandaj, edhe Edi Rama e mbron Sandër Lleshajn, duke mos e shkarkuar!

Ky është modeli i shtetit policor, i ndërtuar nga Edi Rama. Ky është bërë një model i padurueshëm për qytetarët, që po thonë “mjaft më! Duhet ndryshim”! Qytetarët meritojnë një qeveri që i trajton me respekt dhe dinjitet shtetasit e vet.

E.M./r.k./Shqiptarja.com

TAG:
• PD
• enkelejd alibeaj
• policia e shtetit
• vrasja e klodjan rashes