Gazetarja Katerina Rista deklaroi nga Athina se vrasja e shqiptarit Jani Aliaj në burgun e Koridhalos në Greqi, nuk u parandalua nga autoritetet greke.

Në një intervistë për “Studio Live” në Report Tv, Rista u shpreh se prej 6 muajsh, disa persona kanë tentuar ta vrasin Aliajn.

“Nuk ishte hera e parë. Kemi 6 muaj që ne kemi konstatuar se disa persona kanë tentuar ta vrasin këtë person, pra, Jani Aliajn, 49-vjeçarin shqiptar në burgun e Koridhalos. Ka ardhur në Greqi që në vitin 2016. Një grek është futur në qelinë e shqiptarit, mesditën e së hënës me një thikë dhe këtu ngrihet pikëpyetja në fakt, asnjë nga autoritetet përkatëse nuk arriti ta kapë dhe të parandalojë një ngjarje të tillë.”, theksoi ajo.

Rista shtoi se autoritetet greke, nuk e kanë përjashtuar mundësinë që urdhri për vrasjen e Aliajt, të jetë dhënë nga një grup kriminal shqiptar.

“Sipas informacioneve paraprake që kemi nga autoritetet greke, nuk përjashtohet mundësia që të jetë dhënë urdhri nga një grup shqiptarësh, me të cilët viktima ka pasur konflikte të mëparshme. Pra, autoritetet greke po shohin mundësinë që të jenë të përfshirë një grup shqiptarësh të cilët kanë pasur konflikte të mëparshme me viktimën.”, deklaroi gazetarja.

Sipas Ristës, në përditshmëri, shqiptarët dhe grekët kanë raporte të mira, por kanë përplasje lidhur me shpërndarjen e lëndëve narkotike në zona të ndryshme.

“Sa i përket jetës së përditshme, është konstatuar se nuk ka asnjë problem me qytetarët, si shqiptarë, si grekë, bashkëjetojnë normalisht. Sa i përket kriminalitetit, shohim se ka një bashkëpunim. Në shumicën e rasteve, siç janë ata që njihen si greek mafia, përdorin shqiptarët për të kryer veprat kriminale. Kur bëhet fjalë për shpërndarjen e drogës në lagje, shohim që ka një përplasje se kush do të mbizotërojë, shqiptarët apo grekët dhe kanë një përplasje, sa i përket fushës së narkotikëve.”, përfundoi Rista.