TIRANË - Rreth 20 ditë pas shpalljes së pafajësisë për Arben Frrokun, Prokuroria e Krimeve të Rënda ka depozituar në Gjykatën e Apelit dosjen e vrasjes së kryekomisarit Dritan Lamaj.
 
Prokuroria kërkon rrëzimin e vendimi nga Gjykata e Shkallës së parë për pafajësinë e të akuzuarit kryesor për vrasjen e Lamajt, Arben Frrokut.
 
Nga të njëjtat burime mësohet se nesër do të hidhet edhe shorti për përcaktimin e trupës gjykuese dhe për datën se kur do të zhvillohet seanca e parë gjyqësore në Apel.
 
Pas 48 seancash gjyqësore, Arben Frroku është shpallur i pafajshëm nga Gjykata e Krimeve të Rënda për akuzën e vrasjes së Dritan Lamajt në 2013 në Tiranë.
 
Për Gjykatën e Shkallës së Parë, Prokuroria nuk solli prova bindëse e për këtë arsye, dëshmia e dëshmitarit të mbrojtur Arben Ndoka dhe e bashkëshortes së tij Liza Ndoka u konsideruan të pavlefshme pasi ata nuk kanë qenë të pranishëm në momentin e vrasjes siç pretendonte prokuroria por kanë mbërritur aty 4 min pas vrasjes së Lamajt kur u largua automjeti BMW dhe trupi i Lamajt u dërgua në spital.
 
Një tjetër provë e prokurorisë e rrëzuar ishte dhe ajo e gjetjes së elementëve të qitjes në pallatin e Arben Frrokut. Gjykata e rrëzoi këtë provë të prokurorisë pasi sipas ekspertit, nuk mund të provohet 100% se nitratet e gjetura janë si rezultat i qitjes pasi provat nga pallto janë marrë në mënyrën e gabuar.
 
 
Redaksia Online
(a.h/shqiptarja.com)