Vrasja e të moshuarave në Durrës
Arrestohet në Spanjë autori i tretë

SPANJE- Arrestohet personi i tretë i dyshuar për vrasjen e dy të moshuarave në qytetin bregdetar të Durrësit mëngjesin e 2 shtatorit 2014. Indrit Shaqja, 41 vjeç nga Shijaku, u arrestua në Barcelonë të Spanjës në sajë të bashkëpunimit të Interpol Tirana me Interpol Madrid. Arrestimi i tij u bë me qëllim esktradimin drejt Shqipërisë.
 
Gjykata e Rrethit Gjyqësor Durrës me vendimin Nr 747, datë 20.09.2014 ka caktuar masën e sigurisë “Arrest në burg” ndaj shtetasit Indrit Shaqja, për kryerjen e veprës penale të “Vjedhje me pasojë vdekje e kryer në bashkëpunim”, parashikuar nga nenet 141 dhe 25 të Kodit Penal.

41-vjeçari Indrit Shaqja mësohet se katër ditë mbas ngjarjes së rëndë është larguar në mënyrë klandestine në Greqia e më pas në Spanjë, ku edhe u bë e mundur arrestimi i tij.


(Në foto: Indrit Shaqja, i dyshuari kryesor për vrasjen e dy të moshuarave në Durrës)
 
Ndërsa në 19 shtator u bë i mundur arrestimi i dy autorëve të tjerë të ngjarjes 28-vjeçarit Velson Elmazi nga Elbasani, dhe 28-vjeçarit Artur Kaçanolli nga Shijaku.
 
Këta shtetas dyshohet se bashkëpunim me njëri-tjetrin më datë 2 shtator kanë hyrë në banesën e dy kunatave, të moshuarave Elsa Vava 72 vjeç dhe Gjinovefa Vava 77 vjeç, për të vjedhur sende më vlerë dhe para, por kanë hasur kundërshtinë e të moshuarave dhe për këtë ata kanë nisur t'i torturojnë deri në vdekje viktimat, të cilat u gjetën nga policia të lidhura dhe mbytura me qese plastmasi në kokë në shtëpinë e tyre në lagjen nr.11 të Durrësit mbrëmjen e 2 shtatorit 2014. Ato jetonin së bashku në banesën e vjetër dykatëshe në një nga lagjet kryesore të Durrësit.

Redaksia Online
(e.s/shqiptarja.com)