Vulin fyen: Ata që më penguan
në Gjakovë nuk ishin njerëz

BEOGRAD - Ministri për Kosovën në Qeverinë e Serbisë, Aleksandër Vulin pas dështimit për të hyrë në Kishën Ortodokse në Gjakovë, ka mbetur shumë i inatosur aq sa ka fyer nënat, baballarët dhe familjarët e viktimave të luftës dhe të zhdukurve në Kosovë, të cilët protestuan para kishës.

Ai ka thënë se ata “nuk janë njerëz”. “Ndoshta kanë qenë shqiptarë, nuk e di, por njerëz ju siguroj se nuk kanë qenë”, ka thënë Vulin për Radio Televizionin e Serbisë.

Kryekomunarja e Gjakovës, Mimoza Kusari Lila për refuzimin e vizitës së Vulin u shpreh se "Serbia të kërkojë më parë falje e pastaj të vijë në Kosovë".

Ndërsa Vulin i ka bërë thirrje te komuniteti ndërkombëtar, që të punojnë më shumë për sigurimin e të drejtave të serbëve në Kosovë.

Edhe Ministria e Punëve të Brendshme ia ndaloi Vulinit vizitën në Gjakovë, njofton nëpërmjet një komunikate kjo ministri.

“Me qëllim të sqarimit te opinionit lidhur me kërkesën e Aleksander Vulin për të vizituar Republikën e Kosovës, përkatësisht komunat e Pejës, Gjakovës, Mitrovicës dhe Graçanicës, dëshirojmë t’i informojmë se ministri i MPB-së, Bajram Rexhepi, më datë 3 janar 2014, ka marrë vendim për të refuzuar vizitën e Vulinit në Komunën e Gjakovës, e paraparë për datë 6 dhe 7 janar 2014”, thotë komunikata e MPB-së, ndërsa bashkëngjit letrën e ministrit Rexhepi drejtuar shefit të Zyrës së BE-së në Kosovës, Samuel Zbogar”.

“MPB-ja siguron gjithë qytetarët e vendit se çdo vendim për lejimin apo moslejimin e vizitave të tilla merret me përgjegjësi shtetërore dhe institucionale, duke respektuar legjislacionin në fuçi dhe në përputhje me interesat e qytetarëve të vendit.

Në këtë drejtim, MPB-ja fton autoritetet komunale në Gjakovë të mos krijojnë shqetësime dhe brenga për qytetarët, para se të njihen me realitetin, i cili është se Vulinit i është refuzuar kërkesa dhe nuk do të lejohet të vizitojë Komunën e Gjakovës”, mbyllet komunikata e MPB-së.


(Në foto: Një nga posterat që mbajtën qytetarët e Gjakovës në protestën kundër vizitës së Vulin).

Deklaratën e Vulnit mund ta dëgjoni duke klikuar këtu: http://www.rts.rs/page/stories/sr/story/9/Politika/1489164/Vulin%3A+Neizbrisiva+mrlja+na+obrazu+Evrope.html

Marrë nga Zëri

Redaksia Online
(mag/shqiptarja.com)