VV përgënjeshtron policinë: Njësi
anti-terroriste ishin në operacion

Lëvizja Vetëvendosje hedh poshtë deklaratat e policisë se nuk ka përdorur armë gjatë operacionit të së dielës ku arrestoi ish liderin Albin Kurti dhe 90 aktivistë apo anëtarë të kësaj partie.
 
Në një deklaratë për mediet, Vetëvendosje akuzon policinë për ushtrim dhune ndaj aktivistëve nëpërmjet përdorimit të njësisë për operacione speciale për veprime anti-terroriste.
 
“Nuk mund të flitet për proporconalitet kur godina e një subjekti politik bastiset, terrorizohet dhe nënshtrohet nga më shumë se një mijë policë të armatosur. Njësia Speciale Intervenuese, që hyri dhunshëm brenda zyrave, përdoret për eliminim dhe trajnohet si njësit i tillë. Për këtë arsye, armatimi që përdorin ata është i kalibrit të lartë”, thuhet në deklaratë.
 
Vetëvendosje ka publikuar edhe një video ku duket mjaft qartë hyrja e njësisë speciale brenda ndërtesës ku të gjithë janë të armatosur. Madje Vetëvendosje pretendon se ka edhe video të tjera ku shihen pjesëtar të policisë me armë drejtuar ndaj aktivistëve, dhe me tytat kanë goditur e kanë lënduar shumë prej tyre.
 
“Policia e Kosovës ka bastisur në mënyrë të paligjshme zyrat e Lëvizjes dhe pa vendim nga gjykata. Gjatë bastisjeve janë shkatërruar zyrat e VETËVENDOSJE!, si dhe janë konfiskuar edhe serverët, ku janë të regjistruar të gjitha aktet çnjerëzore të nga kamerat e brendshme të ndërtesës. Ky konfiskim është bërë vetëm e vetëm që të fshihen veprimet e dhunshme policore brenda zyrave tona”-vijon deklarata e Vetëvendosje.
 
Sipas komunikatës ekspertë sigurie dhe të pavarur kanë shpjeguar se operacioni i së dielës ishte sulm i llojit luftarak e jo një operacion arrestimi.
 

Redaksia Online
(f.s/shqiptarja.com)