E zbulon Wall Street Journal: Elon Musk përdorues i rregullt i drogave, kokainë e ketaminë

"Përdorimi i drogës nga Elon Musk ka shqetësuar drejtuesit dhe anëtarët e bordeve të bizneseve që ai drejton" shkruan Wall Street Journal, në një artikull për miliarderin me famë ndërkombëtare, duke pretenduar se ai është një konsumues i rregullt i drogave të rënda.

Media amerikane shkruan se nga burime të afërta me Musk, bëhet me dije se ky i fundit ka konsumuar LSD, kokainë, ekstazi dhe kërpudha psikedelike, shpesh në festa private.

Ndër të tjera, raportohet se njerëz të afërt me shefin ekzekutiv të Tesla Inc. dhe SpaceX, janë shprehur për gazetën amerikane se Musk është një përdorues i rregullt i drogave, veçanërisht i ketaminës.

Në gushtin e vitit 2023 Musk tha se ky produkt është një antidepresant i rekomanduar nga mjeku.

Alex Spiro, një nga avokatët e Musk, i është përgjigjur artikullit duke thënë për WSJ se klienti i tij është "testuar rregullisht për drogë në SpaceX dhe nuk ka dështuar kurrë në asnjë test".

Spiro i ka quatur të rreme akuzat në artikull.

Gazeta raporton se Linda Johnson Rice, e cila u bë drejtoreshë e Tesla-s në vitin 2017, nuk u rizgjodh dy vjet më vonë nga zhgënjimi me sjelljen e Musk dhe shqetësimet e saj për përdorimin e drogës nga ai.

Musk zotëron 6 kompani: "Tesla", "SpaceX", kompaninë e mediave sociale "X", "The Boring Co", "Neuralink" dhe "xAI".

Pasuria e tij neto prej 219.4 miliardë dollarësh renditet në vendin e parë në Indeksin e Miliarderëve të Bloomberg.

K.M/S.G/Shqiptarja.com

TAG:
• SpaceX
• Tesla
• elon musk