Ministrja e Kulturës Mirela Kumbaro theksoi se Zana Çela vjen në drejtimin e Teatrit të Operës dhe Baletit pas një sezoni artistik të suksesshëm. Më tej ministrja e kulturës theksoi se Zana Çela ka një eksperiencë të vyer.
"Teatri do të vazhdojë me një program të plotë sepse është gjithë periudha që ne kemi menduar në radhë të parë të mos prekim programacionin e vitit dhe në radhë të dytë të mund të kryejmë të gjitha fazat e parashikuara nga ligji për të mbërritur në fillimin e punimeve. Unë besoj se Zana Çela bën pjesë te njerëzit që i bëjnë gjërat me dashuri dhe kam kënaqësi që tu le juve bashkë me drejtoreshën të filloni punën sot", u shpreh Kumbaro.
Drejtoresha e re e teatrit të operës dhe baletit u shpreh para artistëve se i ka ndjekur gjatë gjithë kohës me emocion premierat e tyre, dhe bëri gjatë përshëndetjes edhe një falënderim për ish drejtorin e dorëhequr një muaj më parë Ilir Kernin që sipas saj “ka punuar me pasion.”
"Një falënderim sigurisht është edhe për drejtorin Ilir Kerni i cili e ka drejtuar me sukses së bashku me të gjithë drejtorët e tjerë të këtij institucioni, ka drejtuar me entuziazëm edhe me shumë pasion", shprehet Çela.
Do ta bëj teatrin e operës dhe baletit kozmopolitan, është shprehur Çela gjatë prezantimit të shkurtër të programit të saj, duke theksuar se ka hartuar edhe një strategji menaxheriale për teatrin e operës, që sipas saj, nuk mund të mjaftohet vetëm me buxhetin e shtetit.
"Ekzistojnë metoda të vjetra në gjithë sistemin teatror dhe për këtë arsye rekomandohet që të futen metoda të reja të inovacionit në të gjitha aspektet dhe në të gjitha drejtimet e menaxhimit artistik, organizativ dhe financiar", u shpreh Drejtoresha e re e Teatrit të Operës dhe Baletit Zana Çela.
![3](http://www.shqiptarja.com/foto/245873.jpg)
![4](http://www.shqiptarja.com/foto/245874.jpg)
Redaksia Online
(M.Ç/shqiptarja.com)
![](https://www.shqiptarja.com/template/img/sh_logo1.png)