Zbulohet çfarë shkruhet në letrën që Joe Biden i la Trumpit në Zyrën Ovale

Presidenti amerikan Donald Trump ka zbuluar përmbajtjen e letrës që paraardhësi i tij, Joe Biden, i la përpara se të largohej nga Zyra Ovale. Gjatë një interviste për Fox News, Trump tregoi se letra ndodhej brenda tryezës Resolute.

Në letër shkruhej:

Për Presidentin e 47-të të Shteteve të Bashkuara

I dashur President Trump,

ndërsa largohem nga kjo zyrë e shenjtë, ju uroj ju dhe familjen tuaj më të mirat për katër vitet e ardhshme. Populli amerikan dhe e gjithë bota shikojnë nga Shtëpia e Bardhë për stabilitet në stuhitë e pashmangshme të historisë dhe është lutja ime që vitet e ardhshme të jenë një kohë prosperiteti, paqeje dhe të hareshme për kombin tonë.

Zoti ju bekoftë dhe udhëzoftë ashtu siç e ka bekuar dhe udhëzuar vendin tonë të dashur që nga themelimi i tij. 

Ajo ishte firmosur “Joe Biden” dhe datuar më 20 janar 2025.

Përpara se ta ndante publikisht, Trump kishte komentuar më herët mbi letrën, duke përmendur se zarfi mbante numrin “47.” Ai tha:
“Ishte një letër shumë e bukur, një lloj frymëzimi. Më tha të gëzoja punën, të bëja një punë të mirë. Ishte shumë e rëndësishme dhe fliste për sa e rëndësishme është kjo detyrë.” Ai shtoi: “Ishte një gjest pozitiv nga ana e tij, dhe e vlerësova letrën.”

Kjo traditë presidenciale e lënies së një letre për pasardhësin filloi në vitin 1989, kur presidenti Ronald Reagan i la një letër George H. W. Bush pas largimit të tij nga Shtëpia e Bardhë.

Tradita ka vazhduar me presidentët Bill Clinton, George W. Bush, Barack Obama, Donald Trump dhe Joe Biden.

Katër vjet më parë, Biden e përshkroi letrën e Trump-it si një mesazh “shumë bujar,” por nuk e zbuloi kurrë përmbajtjen e saj, duke e mbajtur private.

K.M/Shqiptarja.com

TAG:
• SHBA
• donald trump
• Joe Biden