Zgjedhjet, ambasadorja USA: Liderët
politikë përgjegjës për çdo incident

PRISHTINE- “Liderët politikë të Kosovës do të jenë përgjegjës për incidentet e mundshme gjatë ditës së votimit”. Është kjo deklarata që ka bërë ambasadorja amerikane në Kosovë Tracey Ann Jacobson gjatë një interviste televizive ku theksoi se bashkësia ndërkombëtare do ta ndjekë me vëmendje të veçantë procesin e balotazhit, që mbahet të dielën.
 
Gjatë intervistës për emisionin “Rubikon” të KTV-së, ajo vlerësoi si sukses procesin e 3 nëntorit duke kërkuar që procesi të jetë i njëjtë edhe këtë të djelë.
 
“Kërcënimet, kanosjet e akuzat e çfarëdo lloji, gjatë fushatës, janë të papranueshme. Kam kërkuar nga udhëheqësit politikë që të flasin me aktivistët e tyre, me njerëzit nëpër terren, sepse fundja bashkësia ndërkombëtare do t’i mbajë partitë politike përgjegjëse për sjelljet e aktivistëve të tyre gjatë zgjedhjeve”, ka thënë ambasadorja.
 
E pyetur për premtimet milionëshe gjatë fushatës, përfaqësuesja e SHBA-së në Kosovë ka thënë se votuesi duhet ta dijë se këto shuma tejkalojnë totalin e buxhetit aktual të Kosovës. Ajo ka folur edhe për marrëdhëniet ndërmjet Prishtinës dhe Beogradit duke thënë se thelbësore është normalizimi i raporteve ndërmjet dy vendeve.
 
Ndërkaq sipas ambasadores, procesi i privatizimit të PTK-së mbetet shumë i rëndësishëm.” Shpresoj që privatizimi i PTK-së të kryhet gjatë dhjetorit. Dështimi i privatizimit do të dërgonte një porosi të ftohtë tek investitorët e huaj”, ka deklaruar Jacobson.


Redaksia online
(er/sg/shqiptarja.com)