Zgjedhjet e 14 majit, Celibashi: Sistemi elektronik i sigurt nga sulmet kibernetike

TIRANË- Sistemi elektronik që do të përdoret në zgjedhjet vendore të 14 majit nuk ka asnjë rrezik që të bie pre e sulmeve kibernetike. Kreu i KQZ-së, Ilirjan Celibashi garantoi se janë rrjete të mbyllur e që ofrojnë siguri maksimale.  

“Fakti që qoftë procesi i identifikimit elektronik, ashtu edhe i votimit elektronik nuk janë të lidhura me rrjete të jashtme, nuk lidhen me internetin, janë rrjete të mbyllura, ofron garanci maksimale në kuptim të pamundësisë për të qenë të sulmuara nga faktorë apo aktorë të tretë”, tha Celibashi.

Megjithatë, nisur nga historia, ku disa sisteme në Shqipëri u sulmuan, Celibashi theksoi se duhen shtuar masat e sigurisë për të parandaluar një vjedhje të të dhënave.

“Megjithatë, do të vijë koha dhe momenti që në një mënyrë ose në një tjetër, këto sisteme do të duhet të komunikojnë, duke shfrytëzuar rrjetin e internetit, minimalisht për të bërë transmetimin e rezultatit apo të dhënave përkatëse, ndaj është e rëndësisë së dorës së parë që ne të tregojmë të gjithë kujdesin e duhur përsa i përket çështjes së sigurisë”, u shpreh Celibashi.

Këto deklarata i bëri në konferencën Ndërinstitucionale në përgatitje të Zgjedhjeve Vendore 2023 me temë "Dimensionet Ndërsektoriale të Digjiitalizimit të Zgjedhjeve - Siguria Kibernetike dhe Sfidat e Saj". 

B.K./KT/Shqiptarja.com

TAG:
• kqz
• zgjedhjet vendore 2023
• ilirjan celibashi
• Irani sulme kibernetike Shqipërisë