Zgjedhjet, Mediu: Duam vëzhgues
nga ODIHR, PR-së nuk i lejohen

TIRANË - Kryetari i Partise Republikane, Fatmir Mediu, priti dje në selinë e partisë, përfaqësuesit e Misionit të OSBE-ODHIR, të cilët po zhvillojnë një sërë takimesh me përfaqësuesit politikë në Shqipëri, në prag të zgjedhjeve të 23 qershorit. Ai ka kërkuar, pjesëmarrjen sa më të gjerë të vëzhguesve të OSBE-ODHIR në kushtet kur partive të vogla iu është mohuar çdo e drejtë mbi procesin, duke mos u lejuar as vëzhgues, as numërues.

Kryefjala e republikanëve në këtë takim ishte kodi elektoral, i cili më shumë deformon një proces të rregullt dhe gjithpërfshirës zgjedhor, duke anatemuar krejtësisht partitë e vogla në të gjitha aspektet zgjedhore, duke filluar nga teknikalitetet e duke mbaruar te numri i votive që ata marrin.

"Ky është një kod tërësisht antidemokratik", - u shpreh zoti Mediu.-"Pjesëmarrja sa më e gjerë e vëzhguesve të OSBE-ODHIR përvec se do të ishte një support për partitë e vogla, të cilave u është mohuar çdo e drejtë mbi procesin, duke mos u lejuar as vëzhgues, as numërues, do të garantonte gjithashtu edhe vete qytetarët, të cilët do të kenë besim se vota e tyre do të numërohet në mënyrë të rregullt dhe transparente”.

Ekipi vlerësues i ODIHR vijon sot takimet në Tiranë; ato nisën me Kryetaren e KQZ-së, Lefteri Lleshi dhe nënkryetarin Denar Biba për të vijuar me kreret e partive të vogla, me përfaqësues të Kolegjit Zgjedhor, me përfaqësues të shoqërise civile dhe me analistë. Konkluzionet e takimeve do të bëhen publike në një raport që do publikohet në fund të misionit në faqen online zyrtare të OSBE.

"Qëllimi është të njihemi me situatën dhe të dalim me konkluzionin nëse ODIHR duhet apo jo të dërgojë mision vëzhgues për zgjedhjet. Ne këtë raport do ta publikojmë në faqen tonë zyrtare.”- tha dje përfaqësuesja e ODIHR, Nicola Schmidt.

Po dje, ata janë takuar me Kryeministrin, Sali Berisha; me ministrin e Jashtëm, edmond Panariti dhe me kryetarin e LSI-së, Ilir Meta.

Redaksia online
(ar.sh/shqiptarja.com)

TAG:
• kqz
• OSBE