TIRANË - Si çdo prag zgjedhjesh, në Selinë e Partinë Demokratike janë intensifikuar vizitat e krerëve të partive aleate. Me kohën që nuk premton, kreu i PR Fatmir Mediu, ai i agrarëve Agron Duka, Vangjel Dule i PBDNJ si dhe përfaqësuesit e Ilir Metës shkruan në PD për të mbyllur marrëveshjen elektorale.

I rikthyer dy herë në selinë e demokratëve këtë të martë, Fatmir Mediu ishte i paqartë nëse marrëveshja me Berishën e ka kënaqur.

"PR është e pakënaqur me rezultatin që ka pas deri më tani, kërkon rezultat më të mirë, por ky nuk mund të jetë si një raport dhurate por raport konkret i përfitimit elektoral të përbashkët”", tha Mediu. 

“Janë disa nga qarqet e vendit në të cilat kemi një prani substanciale dhe shpresojmë që kjo të reflektohet edhe në votë. Ende nuk e kemi mbyllur se ku do të kandidoj apo numrat”, tha Vangjel Dule. 

Edhe Tedi Blushi e Edmond Haxhinasto të PL që shkuan në PD në emër të Ilir Metës, thanë se marrëveshja është drejt fundi, por pa specifikuar sesa të tjerë nga radhët e Partisë së Lirisë do të kenë shansin e njëjtë me kreun e tyre që nga burgu ka siguruar një vend të sigurt në listat e Tiranës.

"Janë drejt përfundimit, kaq mund t’iu them", tha Blushi. 

Agron Duka ishte i vetmi që doli nga selia blu i qartë se çfarë kishte arritur në tryezën e negociatave.

"I kam mbyll negociatat unë. Po me gojë, se me kalem nuk ka gjë këtu. 1 në listë të mbyllur edhe nga 1 në 10 qarqe. Nëse ndonjëri prej nesh nuk i përmbahet kontratës, prishet kontrata", tha Duka. 

Të kënaqur ose jo, nga lista e përbashkët, Berisha u kujtoi të vegjëlve se do të marrin aq sa peshë elektorale kanë.

"Koalicioni bëhet mbi bazën e një rekordi elektoral", tha Berisha. 

Larg arritjes së dakordësisë për t’ju bashkuar trenit opozitar në zgjedhje, duket Shpëtim Idrizi i PDIU me të cilin Sekretari i Përgjithshëm i PD Flamur Noka ka zhvilluar takime, por pa prodhuar një produkt konkret.

Afati i fundit që PD dhe aleatët kanë për të regjistruar koalicionin është 3 marsi, e bashkë me marrëveshjen politike duhet të vuloset edhe emri.