Zgjedhjet, Meta letër institucioneve për zbatimin e ligjit: Janë evidentuar shkelje, respektoni ligjin! Vë në dijeni Sorecën, Kim dhe Del Monaco

Presidenti i Republikës i ka dërguar një letër 9 krerëve të institucioneve të rëndësishme në vend, 7 të tjerëve në vëmendje, në lidhje me respektimin e ligjit për zgjedhjet. Meta në letër ka vënë në dijeni edhe ambasadorët më të rëndësishëm në vend, Del Monaco i OSBE, Soreca i BE dhe Yuri Kim i SHBA.

Në letër Meta i bën thirrje krerëve të institucioneve që të kryejnë detyrën me integritet dhe përgjegjshmëri të lartë. Ai apelon që të denoncohen punonjësit që kryejnë shkelje ligjore.   Presidenti shkruan se deri tani janë evidentuar veprime të shpërdorimit të funksionit publik. Letra i është dërguar. 

Letra të i është dërguar Genti gazhelit, Drejtor i Përgjithshëm i Doganave, Delina Ibrahimajt, drejtoreshë e Përgjithshme e Tatimeve, Jonaid Myzyri kryetar i Komisionit të Prokurimit Publik, Reida Kashta drejtore e Përgjithshme e Agjencisë së Prokurimit Publik, Arta Lames drejtor i Përgjithshëm i Kadastrës, Adrian Bylykut drejtor i Përgjithshëm i Agjencisë Kombëtare të Burimeve Natyrore, Ardi Veliut drejtor i Përgjithshëm i Policisë së Shtetit, Elvis Koçit Drejtor i Përgjithshëm i Parandalimit të Pastrimit të Parave, Agim Ismailit Drejtor i Përgjithshëm i Burgjeve.

Ndërkohë që janë vënë në dijeni Ilirjan Celibashi, Komisioneri Shtetëror i Zgjedhjeve, Erinda Ballanca Avokate e Popullit, Arben Shehu kryetar i Kontrollit të Lartë të Shtetit, Genc Sejko, Guvernator i Bankës së Shqipërisë, Ervin Mete drejtor i Përgjithshëm Ekzekutiv i Autoritetit të Mbikëqyrjes Financiare, Juliana Latifi kryetare e Autoritetit të Konkurrencës, Enkelejda Muçaj avokate e Përgjithshme e Shtetit.

Letra e plotë

Të nderuar drejtues të institucioneve shtetërore,

Ashtu sikurse jeni në dijeni, vendi ynë aktualisht gjendet në periudhë zgjedhore, për mbajtjen e zgjedhjeve të përgjithshme për Kuvendin e Shqipërisë më 25 prill 2021.

Në përmbushje të rolit dhe misionit të tij kushtetues, për mbrojtjen e parimeve, dhe të drejtave themelore të njeriut, të njohura nga Kushtetuta, si dhe me qëllim garantimin e mirëfunksionimit të të gjithë aparatit shtetëror në tërësi, Presidenti i Republikës, në ushtrim të kompentencave kushtetuese është angazhuar maksimalisht për të ndjekur edhe me më shumë vëmendje dhe për tu informuar, mbi funksionimin e institucioneve shtetërore, përgjatë periudhës së fushatës zgjedhore, situatën para dhe paszgjedhore në tërësi, deri në daljen e rezultatit përfundimtar zyrtar të zgjedhjeve dhe fillimit të ushtrimit të mandatit prej Kuvendit të ri.

Në funksion të realizimit të një procesi zgjedhor të qetë dhe sipas standardeve europiane; për mbrojtjen dhe respektimin e të drejtave dhe lirive themelore të njeriut; dhe për të frenuar e denoncuar çdo fenomen negativ që mund të shfaqet përgjatë gjithë kësaj periudhe, Presidenti i Republikës, do të ketë vëmendjen maksimale për të monitoruar veprimtarinë e administratës shtetërore, situatën zgjedhore në tërësi, për të evidentuar apo frenuar çdo veprim apo mosveprim të kundraligjshëm, që reflekton hapur përpjekje për të ushtruar trysni politike, apo që synon të cenojë votën e lirë të qytetarëve të Republikës së Shqipërisë, duke përfshirë këtu edhe vëmendjen e shtuar ndaj të gjithë fenomeneve që mund të reflektojnë shpërdorim të ushtrimit të funksionit shtetëror.

Në të kaluarën, në periudhat para dhe pas zgjedhore, dhe kryesisht përgjatë periudhës tranzitore që përkon nga momenti i zhvillimit të zgjedhjeve e daljes së rezultatit paraprak deri në fillimin e funksionimit të Kuvendit të ri, në veprimtarinë shtetërore në tërësi, janë konstatuar fenomene negative të natyrave të ndryshme, ku më së shumti, e për fat të keq, është vërejtur një apati e funksionimit në administratën publike e shtetërore, e cila nuk ka reflektuar një efiçiencë të plotë.

Në disa raste janë evidentuar veprime të qarta të shpërdorimit të funksionit publik, duke vendosur në rrezik zbatimin e legjislacionit në fuqi, me pasojë cenimin e interesave të shtetit, shkeljen e lirive e të drejtave të njeriut, por dhe uljen e cilësisë së shërbimeve të ofruara ndaj qytetarëve.

Veçanërisht në institucionet që ju drejtoni, kjo periudhë specifike mund të paraqes nivel të lartë të rriskut, për shfaqjen e veprimeve dhe/apo mosveprime të kundraligjshme, apo konstatimit të fenomeneve negative, e që padyshim kërkojnë trajtimin dhe referimin e tyre, sipas dispozitave ligjore respektive mbi sanksionet administrative apo penale.

Duke qenë se institucionet tuaja janë të lidhura drejtpërdrejtë me sigurimin dhe ruajtjen e stabilitetit ekonomik dhe financiar të vendit, interesat fiskalë, respektimin e të drejtave dhe lirive të njeriut, garantimin e rendit dhe qetësisë publike, administrimin dhe ruajtjen e resurseve e pronës publike dhe interesave të shtetit në tërësi, etj, që kanë ndikim direkt edhe në mbrojtjen e sigurisë kombëtare në Republikën e Shqipërisë, si President i Republikës, tërheq vëmendjen tuaj dhe kërkoj rritjen e përgjegjshmërisë në mënyrë të posaçme përgjatë kësaj periudhe, me qëllim që jo vetëm të zbatohet rigorozisht legjislacioni në fuqi, por të ndërmerren të gjitha masat e nevojshme për mbikqyrjen, identifikimin dhe raportimin pranë institucioneve dhe agjencive ligjzbatuese të orientimeve, shtrëngimeve, veprimeve apo vendimmarrjeve që janë në kundërshtim të hapur me ligjin, të kujtdo punonjësi, funksionari, individi, apo subjekti fizik apo juridik privat.

Përsa më sipër, kërkoj nga ana juaj si drejtues, që përmbushja e detyrave funksionale prej strukturave në institucionet tuaja, t’i nënshtrohet një vëmendjeje të shtuar, në drejtim të verifikimit të përditshëm të zbatimit të ligjit për vendimmarrjet sipas fushës së veprimtarisë, ashtu edhe monitorimit dhe mbikëqyrjes së vazhduar, me qëllim garantimin e funksionimit normal të të gjithë aparatit shtetëror.

Edhe një herë më duhet t’ju theksoj që, funksioni shtetëror nga ana juaj duhet të ushtrohet me integritet dhe përgjegjshmëri të lartë, ashtu sikundër ju shpreh mbështetjen time që, për çdo veprim/mosveprim që përbën shkelje të ligjit, të ndërmerren nga ana juaj të gjitha masat e duhura për respektimin e kuadrit ligjor në fuqi, e për të vënë para përgjegjësisë individuale administrative apo penale, çdo shkelës të ligjit.

K.T./Shqiptarja.com

TAG:
• Presidenca
• Ilir Meta
• zgjedhjet parlamentare 2021