Zgjedhjet e parakohshme në vend mund të mbahen në pranverën e vitit që vjen për shkak të ndryshimit të madh të rezultateve preliminare të zgjedhjeve lokale që u mbajtën më 3 nëntor të këtij viti, krahasuar me ato të nivelit nacional që u mbajtën në vitin 2010.

Aktualisht sipas të dhënave preliminare partia e kryeministrit Hashim Thaçi ka arritur të fitojë rreth 27 për qind të votave në nivel të vendit, duke pësuar një rënie prej më shumë se 4 për qind krahasuar me rezultatet e zgjedhjeve nacionale të vitit 2010, kur në nivelet të vendit PDK-ja kishte fituar 32,11 për qind, apo 32 mandate në Kuvendin e Kosovës.

Po ashtu, partia e kryeministri Thaçi ka pasur edhe rënie të besimit edhe te kandidatët për kryetar të komunave, e ku ka arritur të humb përfundimisht në komunën e Malishevës, ndërkaq do të shkojë në balotazh si parti e dytë në komunën e Gjilanit, Vitisë, komuna këto që gjatë mandatit të kaluar janë drejtuar nga kryetar të Partisë Demokratike të Kosovës (PDK).

Ndërkaq, ajo që nuk është pritur ka ndodhur në qytetin e Prizrenit, apo “Jerusalemit” të PDK-së siç konsideron Thaçi këtë qytet.
Në këtë qytet Ramadan Muja, kandidat i PDK-së për kryetar të komunës në raundin e parë të votimeve ka një epërsi prej rreth 12 për qind kundrejt Eqrem Kryeziut, kandidat i LDK-së.

Investimet që janë duke u bërë në ndërtimin e autostradave dhe rrugëve tjera lokale në Kosovë, por edhe premtimet prej dhjetëra milionave euro gjatë viteve në vijim nuk i kanë ndihmuar aspak partisë së kryeministrit Thaçi. Madje, nëse bazohemi në rezultatet preliminare mund të thuhet se premtimet për mandatin e ardhshëm kanë pasur efekt negativ, pasi që pjesa dërmuese e qytetarëve ato i kanë parë dhe konsideruar si mashtrim elektoral.

Lidhja Demokratike të Kosovës (LDK) gjatë zgjedhjeve të fundit lokale që u mbajtën më 3 nëntor me vota gati sa e ka zënë partinë në pushtet e ku siguroi rreth 27 për qind të votave për asamble lokale, apo rreth 3,5 për qind më shumë se në zgjedhjet e fundit nacionale që u mbajtën në vitin 2010.

LDK-ja e Isa Mustafës arriti të shtojë elektoratin e partisë edhe pse gjatë mandatit katërvjeçar thuajse në të shumtën e rasteve nuk e ka luajtur fare rolin e opozitës.

Po ashtu, edhe Aleanca për Ardhmërinë e Kosovës (AAK) pas raundit të dytë të zgjedhjeve që do të mbahen më 1 dhjetor rrezikon të humbë katër komuna që i ka pasur gjatë mandatit të kaluar siç është Peja, Rahoveci, Suhareka, por edhe Gjakova.

Por, në nivel të vendit sipas të dhënave preliminare, AAK-ja ka arritur ta shtojë numrin e votave.

Në këto zgjedhje në total AAK-ja ka arritur të sigurojë 14,3 për qind të votave në nivel vendi, ndërkaq në zgjedhjet nacionale të vitit 2010, AAK-ja kishte arritur të sigurojë 11,04 për qind të votave, e ku vërehet një rritje prej 3,5 për qind.

Zgjedhjet e fundit lokale në vend, kanë nxjerrë rezultate “magjike” sidomos në “Jerusalemin” e kryeministrit, ku epërsia e kandidatit të partisë së tij është rreth 12 për qind më e madhe se ajo e kandidatit të LDK-së për kryetar të komunës. Ndërkaq në Gjilan thuajse i ndodhi e kundërta, e ku takimet e shumta të kryeministrit më qytetarë të asaj komune i shkuan huq.

Marrë nga "Zëri"