Zgjohet Prokuroria,hapet dosja II
që bllokuan prokurorët e Llallës

Furtuna që përfshiu Prokuroritë pas ardhjes në detyrë të prokurores së Përgjithshme të Përkohshme, Arta Marku, duket se do t’i japë tjetër kthesë edhe hetimit të çështjeve të rëndësishme dhe abuzive. Gjatë mbrëmjes së kaluar, Prokuroria e Elbasanit është vënë në lëvizje, duke hedhur dritë mbi dosjen e dytë të zhdukur, pas asaj të KURUM.

Në Organin e Akuzës së këtij qytetit flinin në sirtar tri dosje të bujshme, dy për pastrim parash dhe një për abuzim me fondet e një rruge. Kjo e fundit tashmë ka dalë në dritë, ku ka çuar pas hekurave 11 zyrtarë, mes të cilëve dhe dy ish-drejtues rrugësh, Dashamir Xhikën e LSI dhe Andi Tomën e PD. Ndërsa, pak kohë më parë Prokuroria zbuloi dhe dosjen e dytë të zhdukur, që ishte ajo e KURUM, e cila përfundoi në Gjykatë pas mashtrimit me TVSH.

Ka qenë prokurorja e Prokurorisë së Elbasanit, Armanda Xhaferri, e njohur si një ndër zyrtaret që heton çështjet më të forta dhe të rëndësishme, që ka bërë kallëzim në Policinë e Elbasanit për zhdukjen e këtyre tri dosjeve nga zyra e saj. Ishin pikërisht këto tri dosje që futën në sherr prokuroren Xhaferri me ish-kryeprokurorin e Elbasanit, Dritan Gina, i larguar pak kohë më parë nga Arta Marku.

Xhaferri akuzoi Ginën se i ka hequr në mënyrë të padrejtë dhe në kundërshtim me ligjin tre procedime penale, duke shtuar se dosjet ishin marrë pa dëshirën e saj. Në kallëzimin e bërë, prokurorja kërkoi që dosjet t’i riktheheshin sërish, por tashmë dy prej tyre kanë dalë në dritë dhe janë futur në hallkën e zgjidhjes. Mister mbetet ende edhe një dosje tjetër.

d.c./shqiptarja.com

TAG:
• KURUM