Zhbllokohet sistemi TIMS, u
bllokua disa orë në të gjithë kufijtë

TIRANE - Zhbllokohet më në fund sistemi TIMS, i bllokuar prej disa orësh në të gjitha pikat kufitare të vendit që nga mesdita. Gjatë orëve të bllokimit, hyrje-daljet nga Shqipëria  u mbajtën shënim me dorë në regjistër, duke mos pasur mundësi për të verifikuar identitetin e personave në kërkim.

Drejtoresha e Shqiptarja.com Anila Basha e cila po kthehej nga Brukseli në Tiranë konstatoi mos funksionimin e sistemit TIMS, mesditën e sotme. Madje një oficer i tha se ky sistem nuk funksiononte prej disa orësh dhe emrat e personave që hynin po mbaheshin shënim me stilolaps.

“Në radhën kur qytetarët hyjnë për në Shqipëri, polici mbante shënim me stilolaps të gjithë emrat që hynin. E pyeta oficerin pse po mbante shënim emrat dhe përgjigjja ishte se nuk funksiononte sistemi TIMS prej disa orësh”- dëshmon Anila Basha e cila sapo është kthyer nga Brukseli ku mori pjesë në konferencën për lirinë e medias  ”Speak Up”.

Në një prononcim telefonik për Tv A1 REPORT Basha shtoi se ky proces, i mbajtjes së emrave me stilolaps, po krijonte radhë dhe pritje të gjata,  në një kohë kur fluksi i qytetarëve që hyjnë në Shqipëri për fundjavën e e cila përkon me zgjedhjet e 23 qershorit, është rritur.

Mosfunksionimi i sistemit TIMS për disa orë u raportua edhe nga porti i Durrësit dhe në Kakavijë.

Redaksia online
(sg/shqiptarja.com)