'Zvërneci'/ 'Në fjalorin tuaj me 40 fjalë, 20 i keni sharje', Rama sjell shembullin e ligatinës franceze Camargue: Parajsë e biodiversitetit, njëkohësisht motor ekonomik (FOTOT)

Kryeministri Edi Rama ka shpërndarë një video në rrjetet sociale, e cila tregon pamje nga një avion të flamengove që largohen drejt kufirit me Maqedoninë e Veriut.

Rama ka shkruar se video është e realizuar me Inteligjencë Artificiale, gjë që sipas tij tregon se sa lehtë mund të manipulohet opinioni publik, përmes këtyre pamjeve.

Kryeministri theksoi se që të realizosh të tilla video për të manipuluar opinionin publik, duket t’i marrësh njerëzit për idiotë, pasi sipas Ramës, projekti në Zvërnec nuk është realizuar ende, që të trembë flamengot dhe t’i bëjë të largohen nga vendi.

Postimi i Ramës:

Tani o duhet të jesh idiot o duhet t’i marrësh njerëzit për idiotë, që të sajosh të tilla idiotësira me Inteligjencë Artificiale dhe t’ua tregosh njerëzve për të vërteta të kobshme, se jo për gjë, po me këto pamje i bie që flamingot po ikin nga sytë këmbët  prej zhurmës tuaj jo prej projektit se projekt s’ka akoma dhe s’ka arritur akoma teknologjia t’i bëjë zogjtë të ndjeshëm ndaj projekteve që s’kanë ndodhur

Në vijim të reagimeve ndaj kundërshtarëve të projektit turistik në Zvërnec, kryeministri Edi Rama publikoi të dielën një tjetër postim në rrjetet sociale, ku kësaj here solli shembullin e Bahamasit të largët për të mbrojtur idenë se natyra dhe turizmi i nivelit të lartë mund të bashkëjetojnë shumë mirë me njëra tjetrën.

Rama theksoi se flamingot në destinacionet turistike nuk konsiderohen pengesë për zhvillimin, por pjesë e identitetit dhe atraksionit të tyre. Duke iu referuar flamingove të Vlorës dhe zonës së Zvërnecit, ai tha se sfida nuk është zgjedhja mes natyrës dhe investimeve, por ndërtimi i një modeli ku të dyja të forcojnë njëra-tjetrën. 

Kryeministri përmendi gjithashtu markat ndërkombëtare të hotelerisë luksoze që sipas tij janë pjesë e projektit në Zvërnec, ndërsa e mbylli reagimin ndaj kundërshtarëve të investimit, duke deklaruar se “budallallëku që e ka mbajtur Shqipërinë peng 100 vjet, s’ka për ta ndalur dot” rrugën e zhvillimit të vendit.

Postimi i plotë i Ramës në Facebook

"FLAMINGOT MES PAQES SË BAHAMASIT DHE SHERRIT TË TIRANËS

Në Nassau të Bahamasit, një nga resortet më të famshme dhe më luksoze të Karaibeve, Baha Mar, flamingot nuk konsiderohen problem.

Përkundrazi. Janë simboli i destinacionit. Janë pjesë e identitetit të vendit, pjesë e eksperiencës turistike, pjesë e imazhit me të cilin Bahamasi prezantohet paqësor e mikpritës para botës.

Qindramijëra turistë fotografohen me flamingot çdo vit. Resortet organizojnë aktivitete rreth tyre. Fëmijët mësojnë për ta. Vizitorët vijnë nga larg edhe sa për t’i parë.

Askush nuk pyet më nëse flamingot mund të bashkëjetojnë me turizmin. Pyetja është si të zhvillohet më tej turizmi në mënyrë që flamingot të mbeten gjithnjë aty.

Sepse në ekonominë moderne natyra nuk është armike e zhvillimit. Është pjesë e zhvillimit. Flamingot nuk janë një problem për zhvillimin. Janë një privilegj.

Janë një pasuri që shumë vende turistike do jepnin shumëçka që ta kishin, për ta kthyer në burim mirëqenieje.

Sfida jonë nuk është të zgjedhim mes flamingove dhe turizmit. Sfida jonë është të ndërtojmë një model ku flamingot, laguna, pylli, plazhi dhe turizmi i cilësisë së lartë të forcojnë njëri-tjetrin.

Sepse në fund, askush nuk udhëton mijëra kilometra për të parë atë që gjen më afër. Njerëzit udhëtojnë për të parë atë që është unike.

Dhe për Shqipërinë e shumë gjërave unike, një nga gjërat më unike janë pikërisht flamingot e Vlorës dhe bukuria e rrallë e Zvërnecit.

Madje ka edhe një detaj domethënës. Në Baha Mar, një nga markat kryesore të projektit është Roseëood Baha Mar, një nga emrat më prestigjiozë të hotelerisë luksoze në botë. E njëjta markë është gjithashtu në dosjen e investitorëve të projektit të Zvërnecit.

Ndërkohë që në Zvërnec do të jenë të pranishme edhe disa nga markat më të njohura globale të mikpritjes së nivelit ultra-luks, nga Cheval Blanc te Mandarin Oriental, e deri te Atlantis Resorts, marka që kontribuoi në transformimin e Dubait në destinacionin numër një turistik të Gjirit Arabik dhe që tani ka pranuar të vijë për herë të parë në Europë, në Vlorë, pasi e ka refuzuar gjithnjë ardhjen në kontinentin e vjetër.

Kjo nuk do të thotë se Shqipëria duhet apo do të bëhet Bahamasi. Aspak. Megjithë respektin për atë vend, Shqipëria ka shumë më shumë potenciale.

Kjo do të thotë se Shqipëria ka mundësinë të ëndërrojë fort dhe të ndërtojë një model spektakolar të sajin, ku natyra nuk izolohet nga zhvillimi, por bëhet arsyeja pse zhvillimi ka vlerë.

Shkurt fjala, në jo pak nga destinacionet më të suksesshme turistike të botës, flamingot janë pjesë e suksesit të tyre.

Prandaj: BUDALLALLËKU QË E KA MBAJTUR SHQIPËRINË PENG 100 VJET, S’KA PËR TA NDALUR DOT TË VAZHDOJË RRUGËN E NISUR PËR TA FUTUR KËTË VEND NË LIGËN E KAMPIONËVE TË TURIZMIT BOTËROR"