Presidenti amerikan Joe Biden nis ditën e sotme udhëtimin e tij të parë në Evropë pasi u zgjodh në krye të Shtëpisë së Bardhë, ku do të takohet me partnerët evropianë dhe homologun e tij rus, Vladimir Putin.
“Në këtë moment të pasigurisë globale, ndërsa bota ende përballet me një pandemi që ndodh një herë në shekull, ky udhëtim ka të bëjë me realizimin e angazhimit të Amerikës për të përtërirë raportet tona me aleatët dhe partnerët, dhe duke demonstruar kapacitetin e demokracive për të përmbushur sfidat dhe për të parandaluar kërcënimet e kësaj epoke të re”, citoi Biden në ‘Washington Post’ për përpjekjet e tij diplomatike.
Udhëtimi vjen në një moment kur evropianët kanë ulur ndjeshëm pritshmëritë nga udhëheqja e SHBA në skenën e huaj.
Evropianët Qendrorë dhe Lindorë shpresojnë dëshpërimisht që të forcojnë lidhjet me SHBA. Gjermania kërkon të ruajë praninë e trupave amerikane atje kështu që nuk ka nevojë të ndërtojë të vetat. Ndërkohë, Franca në anën tjetër thekson që SHBA nuk mund të besohet si dikur dhe se Bashkimi Evropian duhet të ndjekë një autonomi më të madhe strategjike në vazhdim.
Presidenti fillimisht udhëton në Britani për një samit të liderëve të G7, ku do të takohet me mbretëreshën Elisabeth , më pas ndalon në Bruksel për një samit të NATO-s dhe një takim me krerët e Bashkimit Evropian. Ndërsa takimi me shefin e Kremlinit është planifikuar në 16 qershor në Gjenevë.
