#reportTV #lajmeshqip #lajme Prej tre ditësh Durrësi nuk i ngjan aspak një qyteti bregdetar që është gati të presë turistët. Më keq akoma. Era kundërmuese e plehrave që kanë mbuluar qytetin, vështirë të afrojë turistë pranë vetes.. Kontejnerët me mbeturina nuk pastrohen në rrugët kryesore dhe as në zonën bregdetare. Në Bashkinë e Durrësit askush nuk prononcohet për situatën tejet problematike me mbetjet urbane, të cilat ky institucion ka detyrim ligjor t’i menaxhojë. ytetarë janë të alarmuar pasi po u rrezikohet shëndeti nga ambienti i ndotur dhe temperaturat e larta ndikojnë në përhapjen e erës së rëndë. Situatën më të rëndë po e përjetojnë banorët e lagjes nr.15 në Spitallë. Aty bashkia ka zbarkuar plehrat në vend-parkimin e kamionëve. “Plehrat që ishin në Porto Romano i kanë sjell këtu. I përpunojnë këtu. Mirëpo problem është që plehrat qëndrojnë këtu disa ditë. Kjo sjell një erë shumë të keqe. Një ambient shumë të rëndë. Këtu ka shkolla, kopshte”, tha një banor. “Shumë e keqe. Mban një ere e keqe shumë. Tmerr. Ka një muaj që është keq fare. Si diçka e ngordhur”, tregoi një tjetër. “Situata shumë e keqe. Kemi fëmijë, të sëmurë. Nuk hapim dot dritaren se na qelb era. Ka 2-3 javë. Sa më shumë po ngrohet koha, aq më keq”, u shpreh një banor. Qytetarët e Spitallës në Durrës kërkojnë që të merren masa sa më shpejt. “Kërkojmë të gjendet një vend tjetër dhe jo të sillen këtu. I sjellin makinat dhe i shkarkojnë këtu”, tha një banor. “Të hiqen sa më shpejt se nuk po flemë dot. Po ikin njerëzit nëpër lagje të tjera se nuk rrinë dot këtu”, u shpreh një tjetër. “Ti heqin se ne jetojmë aty. Vijnë i shkarkojnë ditë e natë”, përfundoi banori. Bashkia e Durrësit është në situatë të rëndë financiare, me fonde të mjaftueshme për të dërguar mbetjet për përpunim në asnjë incenerator. Zgjidhja tashmë i mbetet qeverisë, pasi dhe vetë këshilli bashkiak i Durrësit në mbledhjen e fundit kërkoi fonde nga Ministria e Financave.