Më 15 dhjetor të vitit 1975, dy katera silurues të armatosur, dolën me shpejtësi nga baza ushtarake-detare e Shëngjinit dhe u nisën me urgjencë në drejtim të veriut. Ekuipazhi i dy mjeteve kishte marrë urdhër ti vinte në ndihmë peshkatores “Islam Mustafa”, të sulmuar me armë nga një anije ushtarake jugosllave. Katerat silurues fluturojnë. Anija e huaj futet në shënjestër kur ende gjendej në ujërat tona territoriale, por urdhëri për të qëlluar nuk mbërrin asnjëherë. Pasojat e ngjarjes ishin të rënda. Kapiteni i peshkatores, Fran Ivanaj, ishte vrarë, i qëlluar drejtpërdrejt me top, ndërsa anija ishte bërë shoshë nga predhat. Kohë më pas, hetimet dypalëshe, shqiptare-jugosllave, do të vërtetonin se incidenti ishte zhvilluar në brendësi të ujërave tona territoriale, por shoqëria shqiptare e kohës u mbajt larg të vërtetave të kësaj ngjarjeje. Dhuna e pajustifikueshme e palës jugosllave nuk kishte qenë e rastësishme. Ajo nuk kishte lidhje me peshkimin dhe as me ndonjë shkak tjetër më pak të rëndësishëm. Ngjarja e vitit 1975, kishte lidhje vetëm me situatën e paqartë të vijës ndarëse të kufirit detar mes Shqipërisë dhe Jugosllavisë. Sulmi dhe përgjakja e ujërave territoriale shqiptare, kishin për qëllim diktimin nga jugosllavët të respektimit të linjës së vjetër të ndarjes së kufirit detar, përcaktuar qysh në vitin 1926 sipas Protokollit të Firences.