Gazetarja Rezarta Delisula asnjëherë nuk e ka pasur kohën me tepri. Për shkak të profesionit, i është dashur të jetë përherë në lëvizje. Ideja për t’iu përvjedhur realitetit duke u fshehur nëpër gjethet e domateve, apo perimeve të tjera që sapo kanë filluar të rriten në ballkonin e saj, nuk i lindi papritmas një ditë, mes zhurmave mbytëse të përditshmërisë. Historia ka nisur thuajse 30 vite të shkuara nga babai i saj… Përveçse terapi e çlodhje, koha që kalonte nëpër vazot e ballkonit, tashmë ishte edhe në dobi të Morelit, djalit të saj. Shëndeti i tij qëndron përmbi gjithçka; perimet e pazarit sipas saj nuk ofrojnë asgjë të vërtetë. Në vazot drejtkëndore ka sallatë kale, speca, domate, panxhar, në ato më të voglat, që mund të jenë edhe filxhanë çaji, janë të gjitha erëzat, e po ashtu edhe lulet.... Si amvisë tironse Rezarta na tregon pasionin për gatimin, çajrat natyrale me kombinime të ndryshme e padyshim pijen e preferuar të saj Hardiçin.