Diskutimi i sotëm sjell në vëmendje një prej çështjeve më shqetësuese për shëndetin publik dhe mjedisin në vend: ndotjen e ajrit në Shqipëri, e cila sipas të dhënave më të fundit, ka arritur nivele alarmante, katër herë mbi normën e lejuar. Pasojat e kësaj situate janë të rënda dhe shpesh të parikuperueshme për shëndetin e qytetarëve. Në pjesët më të ndotura të Tiranës si Unaza, Materniteti i Ri, Ali Demi, Rruga e Elbasanit dhe Komuna e Parisit, ndotja e ajrit përbën rrezik të përditshëm për mijëra banorë. Shqipëria, sipas të dhënave rajonale, renditet e para për numrin e vdekjeve në raport me popullsinë prej ekspozimit ndaj ozonit (O₃), një tregues i qartë se ky problem ka kaluar përmasat lokale. Në këtë diskutim në studion e “Rreze Dielli” do të trajtojmë pasojat shëndetësore të ndotjes së ajrit me mjeken pneumologe Klodeta Grosha, e cila do të na ndihmojë të kuptojmë ndikimin konkret në sistemin respirator dhe sëmundjet kronike që po rriten tek qytetarët, si dhe me ambientalistin Besmir Agalliu, që na sjell në fokus shkaqet kryesore të kësaj ndotjeje dhe masat që duhen marrë urgjentisht nga institucionet. Në thelb të debatit qëndron një pyetje thelbësore: A po e vrasim ngadalë veten duke thithur ajrin e qyteteve tona?