VLORË- Nisi si një protestë miqësore, me simbolika, por përfundoi me disa të shoqëruar në Komisariatin e Vlorës. Mosplotësimi i kërkesës së tyre të vetme, që muzika të mos ndalohet në orën 22:00 pasi po dëmton bizneset, ka bërë që pronarët në Vlorë të dalin dhe të protestojnë. Në orën 21:45 ato vendosën të gjithë njëherazi himnin e flamurit me zë të lartë, mirëpo pati edhe disa incidente që përfundoi me disa të shoqëruar në Polici. Kjo gjë solli agravim të situatës, pasi dhjetëra pronarë biznesesh u mblodhën në orët e para të mëngjesit në Komisariatin e Vlorës ku kanë kërkuar lirimin e punëtorëve. “Lironi punëtorit”, ishin këto thirrjet që u dëgjuan para Komisariatit të shoqëruara me duartrokitje dhe fishkëllima. Vasil Bedinaj, kreu i operatorëve turistik në qytetin e Vlorës i ka bërë thirrje Policisë që t’i lirojë pasi ato janë thjeshtë punëtor.