Në botën e bimëve medicinale, natyra na ka dhuruar një pasuri të paçmuar për ruajtjen dhe përmirësimin e shëndetit tonë. Ndër këto bimë, lulja e hibiskusit e njohur për ngjyrën e saj të veçantë dhe shijen e freskët mbetet ende e nënvlerësuar nga shumë njerëz, pavarësisht vlerave të saj të shumta shëndetësore. Në mjekësinë popullore dhe atë bimore moderne, hibiskusi ka filluar të zërë vend gjithnjë e më të rëndësishëm, falë vetive të tij pastruese, qetësuese dhe rregulluese për një sërë problemesh që prekin organizmin. Specialisti i njohur i bimëve mjekësore Ylli Merja, thekson në "Rreze Dielli" rëndësinë e përdorimit të hibiskusit në trajtimin e disa problematikave shëndetësore si hipertensioni, kolesteroli i lartë, problemet me tretjen dhe ato hormonale. Ai sugjeron që për rezultate më të mira, hibiskusi të kombinohet me bimë të tjera mjekësore duke krijuar një sinergji natyrale që përforcon efektin kurativ.