Ishte paralajmëruar një vit protestash, por rezultoi e kundërta pasi ato kanë qenë më të shumta të organizuara nga shoqëria civile apo forumet e kësaj partie.
Lidershipi demokrat e nisi 2016 dhe mbylli me takime intensive me qytetarët në çdo cep të Shqipërisë, ndërsa spikati ftesa e Lulzim Bashës për t’iu bashkuar PD-së, të majtë e të djathtë që janë kundër krimit, korrupsionit dhe keqqeverisjes. Madje disa here Basha u duk sikur ftesën e kishte edhe për ish-aleatin e PD në 2009-2013, LSI e Ilir Metës.
Analistët politikë Roland Lami e Aleksandër Çipa e shohin në këtë mënyrë turin e Lulzim Bashës në takimet me qytetarët duke e lexuar si një përpjekje për konsolidimin e tij si lider i së djathtës dhe i opozitës.
Akuzat ndaj qeverisë nuk munguan asnjë ditë për korrupsionin, kanabizimin e vendit apo kriminalizimin, e madje këto akuza u përkthyen edhe me deklarata të forta për largimin e qeverisë dhe krijimin e një kabineti teknik qeveritar.
Kësaj fryme u duke se iu bashkua për pak ditë edhe kreu i LSI Ilir Meta, i cili kërkoi kompromis politik të të gjithëve për reformën në drejtësi në të kundërtën do jepte dorëheqjen nga posti i kryetarit të kuvendit. Kjo situatë i bëri negociatat të vështira, por jo të pamundura, pasi u konkluduan me marrëveshjen historike për miratimin e ndryshimeve kushtetutese në 22 korrik.
Por beteja nuk u mbyll këtu, ligjet që vënën në zbatim këtë reformë ishin një tjetër përballje politike mes maxhorancës dhe opozitës e cila akuzoi kryeministrin se ligjet e reformës janë në shkelje me konsensusin për kushtetutën e madje ligji i Vettingut që do të bëjë vlerësimin e gjyqtarëve e prokurorëve, ndoqi një kalvar të gjatë institucional nga gjykatat kushtetuese tek komisioni i Venecias.
Ndërsa ka nisur numërimi mbrapsht i muajve për mbatjen e zgjedhjeve parlamentare, të cilat presidenti Nishani dekretoi me datën 18 qershor , sfida për partinë demokratike nuk është aspak e lehtë. Përballë partisë demokratike me aleatët, parti aleate këto që kanë një peshë të vogël në realitetin politik në vend, është një maxhorancë tashmë e konsoliduar ku përkrah PS rreshtohen LSI e PDIU, ku kjo e fundit ka pritshmëri në rritje në zgjedhjet e ardhshme.
Gjatë këtij viti pd pati rastin të testonte veten në dy raste ku u zhvilluan zgjedhjet e pjesshme lokale në Dibër e Kolonjë, ku akuzat e lidershipit demokrat adresoheshin qeverisë për blerje të votave përmes parave të kriminalizuar dhe hashashi.
Me shumë gjasa ky do të jetë edhe formati i koalicioneve në zgjedhjet e 18 qershorit, ndërsa analistët përjashtojnë opsionin e një ribashkimi në koalicion të PD me LSI, kjo thonë ata do të dëmtonte më së shumti Partinë Demokratike. Ndërkaq Lulzim Basha ka deklaruar se aleancën e ka me qytetarët dhe hapja e Partisë Demokratike për të gjithë është objektivi për të cuar sa më shumë vota në kuti për të djathtën në zgjedhjet e qershorit. Por a do të arrijë Lulzim Basha ta bindë elektoratin se është alternativa më e mirë për shqiptarët?
Ndërsa flasim për zgjedhjet, ndryshimet në ligjin që garanton procesin electoral janë ende propozime politike të padiskutuara në komisionin e posaçëm dhe koha për të ndërhyrë në kod është e limituar. Për këtë çështje analistët mendojnë se kjo është një taktikë e të gjitha forcave politike e cila në fund të fundit u shërben për të justifikuar rezultatin zgjedhor të përballjes politike të 18 qershorit të 2017.
Në këto kushte mes dilemave për të fituar besimin e qytetarëve për alternativën e djathtë, lidershipi demokrat e nisi dhe e mbylli vitin kalendarik të 2016. Por a do t’ia arrijë Lulzim Basha ti bindë ata? Kjo pyetje mund të marrë përgjigje vetëm pas 6 muajsh, me 18 qershor të 2017.
Deri atëherë Lulzim Basha ka ende kohë për të trokitur në dyert e shqiptarëve për ti bindur se është alternativa më e mirë për ta.
(d.b/Shqiptarja.com)